Техеран, 19 август 2025 (МИА) – Иран во изминатите шест месеци депортираше 1,2 милиони авганистански бегалци и планира до март следната година да протера уште 800.000, изјави иранскиот министер за внатрешни работи Ескандар Момени, пренесе државната новинска агенција ИРНА.

Со тоа, вкупниот број на депортации би достигнал два милиони од вкупно околу шест милиони Авганистанци кои живеат во земјата.

Момени нагласи дека мерките се спроведуваат согласно законот за странци без валидни дозволи за престој и дека не се мотивирани од „ксенофобија“.

Секоја година, поради конфликтите, сиромаштијата и високата невработеност, голем број Авганистанци нелегално ја преминуваат 300-километарската граница со Иран. Голем дел од нив работат слабо платени работи во големите градови, особено на градилишта, каде што се ценети како евтина и сигурна работна сила.

Еден од клучните фактори за масовните протерувања и запирањето на понатамошниот прилив е длабоката економска криза со која се соочува Иран. И покрај нафтеното богатство, земјата се соочува со растечка невработеност, дополнително влошена од нуклеарниот спор со Западот и меѓународните санкции. ссм/

фото: ЕПА архива