Тел Авив, 1 август 2025 (МИА) - Израелските одбранбени сили (ИДФ) ги отфрлија обвинувањата од панелот на експерти на Обединетите нации (ОН) за „присилни исчезнувања“ на Палестинците на пунктовите за дистрибуција на помош во Појасот Газа, велејќи дека армијата законски ги притвора лицата кои се приближуваат до пунктовите за помош надвор од работното време или на начин што ги загрозува израелските сили.

„Тврдењето за присилно исчезнување на жителите на Газа на пунктовите за помош е произволно и целосно неосновано“, се наведува во соопштението на ИДФ, објавува „Тајмс оф Израел“.

Експертите за човекови права на ОН изразија загриженост во врска со извештаите за вакви инциденти на пунктовите за дистрибуција на храна што ги води Хуманитарната фондација за Газа (ГХФ), предводена од Израел и САД.

Седум независни експерти потврдија во заедничка изјава дека добиле извештаи дека неколку лица, вклучително и едно дете, „исчезнале под принуда“ откако отишле на контролните пунктови на ГХФ на југот од окупираната палестинска енклава и дека ИДФ наводно бил „директно вклучен во присилните исчезнувања на луѓе кои бараат хуманитарна помош“.сд/

фото: МИА архива