Скопје, 13 септември 2022 (МИА) - На четвртиот конкурс за наградата „Пегаз“, за најдобар необјавен роман на годината, што го организираат издавачката куќа „Арс Ламина“ и Фондацијата за унапредување и промоција на културните вредности „Славко Јаневски“, пристигнаа 38 ракописи. Конкурсот беше отворен на 28 април и траеше до 1 септември 2022 година. Во периодот што следува, пристигнатите ракописи ќе ги оценува тричлена жири-комисија, во состав: Владимир Јанковски (писател и добитник на наградата „Роман на годината“ за 2020 година), Елизабета Баковска (писателка и книжевна теоретичарка) и Бисера Бендевска (уредничка во издавачката куќа „Арс Ламина“). Наградата „Пегаз“ се состои од паричен износ од 90.000 денари и објавување на романот во посебна едиција. Добитникот на наградата ќе биде соопштен најдоцна до 30 декември 2022 година, соопшти „Арс Ламина“. На минатогодишното издание на „Пегаз“ пристигнаа 44 ракописи, а за победнички беше избран романот „Хотел меѓу две војни“ од писателот Александар Русјаков, кому му беше врачена наградата на посебна промотивна свеченост. Наградата „Пегаз“ за најдобар необјавен роман е своевидно продолжение на веќе етаблираната награда „Роман на годината“ што ја доделува Фондацијата за унапредување и промоција на културните вредности „Славко Јаневски“. Наградата е востановена и се доделува од 2019 година.са/