Дебар, 31 август 2025 (МИА) - Со средства од првиот повик на Министерството за локална самоуправа, за добивање средства од унгарскиот кредит со кофинансирање од страна на локалната власт, финализиран е еден од капиталните проекти во Дебар, целосната реконструкција на улицата „Петрит Бомова“ (поранешна Здравко Чочковски), во горниот дел на градот, каде што живеат неколку илјади граѓани.

-Денеска ја завршивме целосната реконструкција на улицата „Петрит Бомова“, што е уште еден чекор кон подобри услови за нашите граѓани. Уживајте во овој нов и безбеден пат! Не запираме – продолжуваме без прекин со други проекти, еден по еден, за поразвиен и поубав Дебар, објави градоначалникот Хекуран Дука.

Тој за МИА рече дека вредноста на проектот е 7.180.904 денари со вклучен ДДВ, при што од овој износ општината кофинансирала 5.740.000 денари.

-Споменатата улица по многу години запуштеност и жална состојба, го доби потребниот лик. Овој долгоочекуван проект не беше лесен. Интервенциите на старите улици секогаш носат предизвици, особено со подземната инфраструктура – канализациска и водоводна мрежа, кои бараа длабоки и внимателни интервенции. Со посветеност и неуморна работа, продолжуваме кон финализирање на работите и на други улици. Нашите граѓани го заслужуваат тоа, посочи Дука.

Според него, на првиот повик за добивање средства од унгарскиот кредит, на Општина Дебар и биле одобрени четри проекти и добила 700 илјади евра, за реконструкција на три улици во градот и изградба на водовод во Могорче, кое е најголемо село во општината.

На вториот повик одобрени и се 2,080 милиони евра за реализација на 22 инфраструктурни проекта, кои целосно ќе бидат покриени со овие средства. Со овие средства планирана е реконструкција на повеќе улици во градот, изградба на локален пат во село Долно Косоврасти, пат за село Бомово, реконструкција и доизградба на патни правци кон неколку села, изградба на канализациска мрежа во населбата „Венец два“ и проширување на водоводната мрежа во градот. вт/вј/

Фото: Дука ФБ