Скопје, 20 март 2023 (МИА) - Економско-социјалниот совет попладне ќе одржи седница на која се очекува да расправа за Општиот колективен договор за јавен сектор и да започнат првичните разговори за Законот за плати во јавниот сектор.

Според синдикатите, Нацрт-законот за систем за плати не е системско решение и со него уште повеќе ќе се искомплицира ситуацијата. Ваквото законско решение, посочуваат синдикатите, е спротивно на Уставот бидејќи се прави обид да се регулира исплатата преку правилници, а според уставните одредби, плата се исплаќа само со закон и колективни договори.

Забелешки на законското решение имаат и работодавачите. Претседателот на Собранието на Организација на работодавачи Ангел Димитров во интервју за МИА рече дека висината на платите во јавниот сектор мора да се усогласи со порастот на платите во приватниот сектор. 

- Тие мора да зависат од порастот на платите во приватниот сектор затоа што во приватниот сектор се создаваа новосоздадена вредност, од која треба да се плаќаат даноци и придонеси за работниците и да се полни буџетот за да може потоа да се исплаќаат платите на јавниот сектор, така што тие две компоненти мора да ги гледаме заеднички, рече Димитров. бак/аа/