Ереван, 21 август 2025 (МИА) - Ерменија е подготвена да ги отстрани контролните пунктови на границата со Азербејџан, под услов тоа да се спроведе според петте принципи утврдени во Вашингтонскиот договор, изјави ерменскиот премиер Никол Пашињан.

-Овој договор јасно формулира пет основни принципи: територијален интегритет, суверенитет, јурисдикција, неповредливост на границите и реципроцитет, нагласи Пашињан пред новинарите. „Дури и кога го презентиравме проектот „Крстопат на мирот“, изјавивме дека сме подготвени да воведеме регулативи и олеснувања врз основа на овие принципи“.

Тој истакна дека веќе постојат успешни примери на слични гранични олеснувања низ целиот свет, наведувајќи ја употребата на биометриски пасоши и дигитални технологии кои овозможуваат воведување на сосема нови процедури.

-Во иднина, за пет, 10 или 15 години, методите како што се темелните проверки на луѓето на ерменските гранични премини постепено ќе бидат укинати. Ќе се стремиме да ги поедноставиме процедурите - не само на ерменско-азербејџанските гранични премини, туку и на сите други, со цел да се олесни деловната средина, извозот, увозот и транзитот колку што е можно повеќе. Ова е најсоодветната и најважна средина за бизнисот. Подготвени сме за секакви олеснувања, сè додека се вклопуваат во рамките на петте принципи“, рече Пашињан. мс/

фото: МИА архива