Скопје, 3 март 2025 (МИА) - Директорката на КОВЗРГ, Оливера Трајковска упати телеграма со честитки по повод почетокот на велигденскиот пост до Поглаварот на МПЦ-ОА, Неговото Блаженство Архиепископот Охридски и Македонски и на Јустинијана Прва, г. г. Стефан, до членовите на Синодот, до свештенството и монаштвото, како и до сите верници од православна вероисповед.

-Престојниот Велигденски пост – периодот за личен и заеднички духовен подвиг е пред нас, да бидеме сите заедно во Едната, Света, Соборна и Апостолска Црква. Во име на Комисијата за односи со верските заедници и религиозни групи, како и од мое лично име, Ви упатувам искрени зборови и тивки молитви за благословен и мирен Велигденски пост. Нека ова време на пост и покајание биде причина за укрепување во нераскинливо духовно поврзување. Нека нашите срца се очистат и подготват за најсветиот празник Воскресението Христово, пишува Трајковска во честитката.

Во Светото Писмо, додава таа, е напишано „овој, пак, род се истерува само со молитва и пост“. Затоа , апелира, во овој возвишен период нека нашите молитви бидат искрени и нашите дела исполнети со љубов, како што подучувал и самиот Христос.

-Божјиот благослов да биде со Вас, вели таа, да живееме во мир, со меѓусебна почит и да даруваме љубов христијанска во овие свети денови, а овој пост да нè води кон духовно ослободување и спасение.Благословен и мирен Велигденски пост!, пишува Трајковска во честитката по повод почетокот на велигденскиот пост. сст/ац/

Фото: МИА архива