Скопје, 24 ноември 2025 (МИА) - Проектот „Гласот на револуционерите повторно се слуша“ на „Нова Македонија“ му оддава признание на Димитрија Чуповски за неизбришливиот печат што го оставил во македонската национална историја 

-Димитрија Чуповски е личност која во македонската национална историја остави вечна и неизбришлива трага. Чуповски како општествен деец, револуционер, дипломат, публицист, научник, издавач, историчар, картограф и филолог е еден од најдоследните афирматори на македонската национална мисла, бранител на македонските национални особености и политички интереси кон крајот на 19 век и почетокот на 20 век, се наведува за Чуповски во проектот.

При тоа особено се подвлекува неговото значење во контекст на случувањата од денешна перспектива.

-Од денешна перспектива, доколку се земат предвид постојните негирања на македонските особености - јазик, историја, култура итн., активностите на Димитрија Чуповски имаат уште поголемо значење, затоа што тој во еден од најкритичните моменти на Македонија и македонскиот народ, многу кристално јасно ги заштитуваше и промовираше македонските политички и национални интереси пред светот. Дејноста на Чуповски е тесно поврзана со Македонското научно-литературно другарство во Санкт Петербург и издавањето на списанието „Македонски глас“, списание кое ја пропагираше идејата за самобитна Македонија.

Чуповски, се нагласува, е творец и на првата карта на Македонија во боја и на македонски јазик, карта која, се додава, јасно ги оцртувала етничките граници на Македонија. вг/

Фото: Архивска фотографија