Скопје, 23 јуни 2025 (МИА) - Силните институции се вистинскиот мотор на одржливите промени. Тие ја претвораат визијата во резултати, истакнала министерката за финансии Гордана Димитриеска - Кочоска, на завршната сесија на Годишниот состанок на Управниот одбор на CEF - Форумот, одржан во Бечиќи, Црна Гора.

Како што вечерва соопшти Министерството за финансии, во обраќањето, министерката нагласила дека институционалниот развој не е дополнување на реформите, туку нивна основа.

Таа истакнала дека јавните институции мора да бидат стратешки ориентирани, да дејствуваат со интегритет и да реагираат агилно на предизвиците, особено во управувањето со јавните финансии.

- Нашата способност да спроведеме реформи, не зависи само од стратегии и акциски планови, туку од капацитетот и отпорноста на институциите што ги спроведуваат тие промени, посочила Димитриеска - Кочоска.

Затоа, како што потенцирала Димитриеска - Кочоска, Министерството за финансии го постави институционалниот развој во сржта на својата реформска стратегија со формирањето на Академијата за јавни финансии што е доказ за таа посветеност.

- Академијата не е само центар за обука, туку двигател за градење компетенции и трајна култура на учење, додала таа.

На Форумот, Димитриеска - Кочоска ја истакнала и важноста на регионалниот дијалог и заедничкото учење, при што упатила благодарност до меѓународните партнери за нивната поддршка преку техничка помош, советување и програми за градење капацитети.

- Министерката упати и посебна благодарност до Управниот одбор на CEF за довербата и лидерството, по повод преземањето на претседателството со Управниот одбор од страна на Република Северна Македонија, се нагласува во соопштението на Министерството за финансии. бд/лв/

Фото: Министерство за финансии