• четврток, 11 април 2024

Даштевски: Очекувам фер и демократски избори, ДИК постапува согласно законот

Даштевски: Очекувам фер и демократски избори, ДИК постапува согласно законот

Скопје, 3 парил 2024 (МИА) – Очекувањата се дека претстојните избори ќе бидат фер и демократски без никакви притисоци и покрај вчерашната тензија меѓу претседателските кандидати на потпишувањето на Кодексот за фер и демократски избори, изјави денеска претседателот на Државната изборна комисија, Александар Даштевски, по завршувањето на средбата на претседателите на подмладоците на политичките партии кои потпишаа Декларација за фер, слободни и демократски избори.

– Сметам дека вчерашниот настан за потпишување на Кодексот имаше тензии, меѓутоа не верувам дека ќе продолжи во таа атмосфера, затоа што главно сите услови се исполнети. Од наша страна, односно техничките услови ги преземаме согласно со законот и во согласност на етиката и моралот на сите учесници. Сметам дека ќе биде уште подобро, затоа што сметам дека ќе поминат овие детски болести на напаѓања и нефер кампања и ќе се фокусираат партиите на изборната кампања, односно претставување на програмите, откако ќе почне кампањата, рече Даштевски.

Вели на вчерашното потпишување на Кодексот, дел од претседателските кандидати имале примедби кои се однесуваат на законот за платена политичка програма и кампања, за што рече дека ДИК има законска должност да го спроведува и постапува исклучиво во согласност со законот.

– Вчера имаше примедби кои се однесуваат на законот, што не би требало да бидат адресирани до нас, затоа што ние имаме законска должност и надлежност да го почитуваме законот и така да ги псотавиме работите. Таму се зборуваше претежно за измени во законот, што е доцна и можеби ќе се добие некој политички поен, меѓутоа тие работи треба на време да си се постават, а ние постапуваме исклучиво во согласност со законот и секое непостапување според законот повлекува и одговорност. Тоа беше најмногу за онаа поделба на средствата која не се смени во законот за платена политичка програма и кампања. За таквите работи треба да се залагаат пред почнување на изборниот процес, откако ќе влеземе во изборниот процес треба сите да бидеме дискретни во тие барања, порача Даштевски.

Претседателските кандидати вчера го потпишаа Кодексот за фер и демократски избори, освен претседателскиот кандидат на ГРОМ и коалицијата „Храбро за Македонија“, Стево Јакимовски. Тој порача дека ќе го почитува Кодексот, но дека нема да го потпише доколку ДИК не гарантира дека ќе организира дебати, посочувајќи дека одредени кандидати се максимално фаворизирани и средствата за кампањата не се рамноправно поделени.

Претседателите на подмладоците на политичките партии денеска ја потпишаа Декларацијата за фер, слободни и демократски избори и против говор на омраза, од каде порачаа дека Декларацијата ќе пренесе јасна порака дека младите политичари, како идни носители на одлуки, имаат силна волја и одлучност да бидат идни лидери и да создадат поинаква политичка култура издигнувајќи го политичкиот дијалог на повисоко ниво.

Тие порачаа дека на претстојните избори натпреварот треба да се одвива со програми и идеи, а не како што рекоа, со црна кампања.

Чинот на потпишување на Декларацијата е традиционален настан кој се одржува пред секои избори уште од 2014 година. Пред годинешниве избори, потпишувачи на декларацијата ќе бидат претседателите на подмладоците на 42 политички партии. ра/ев/

Фото: МИА

Остани поврзан