Њујорк, 15 јануари 2024 (МИА) – Генералниот секретар на Обединети нации, Антонио Гутереш денеска по повод сто дена војна во Појасот Газа изјави дека единствено одржливо решение е итен хуманитарен прекин на огнот и апелираше до Хамас за итно и безусловно ослободување на заложниците.

Тој исто така се заложи да се испитаат и кривично да се гонат сите наводи за сексуално насилство од страна на припадниците на Хамас извршени на 7 октомври, при нападот врз Израел.

- Војната на Израел во Газа во текот на изминатите сто дена предизвика големо уништување и смрт на цивили со брзина без преседан. Со ништо не може да се оправда колективното казнување на палестинскиот народ, посочи Гутереш.

Според него што подолго трае судирот во Газа тоа е поголем ризикот од ескалација и на други места.

- Не смееме да го видиме во Либан тоа што го гледаме во Газа и не можеме да дозволиме да продолжи тоа што се случува во Газа, истакна Гутереш. ми/

фото: ЕПА