Скопје, 11 декември 2023 (МИА) - Во октомври годинава се издадени 325 одобренија за
градење, што е за 12,9 проценти помалку во однос на октомври лани, објави денеска Државниот завод за статистика.

Предвидената вредност на објектите изнесува 7 539 575 000 денари и е за 47, 7 проценти помалку во однос на истиот месец од претходната година. Како што појаснува ДЗС, намалената вредност се должи на издаденото одобрение за градење на пругата Бељаковце – Крива Паланка во октомври претходната година.

Најмногу одобренија во октомври годинава се издадени во Скопскиот, 76, Полошкиот, 75, по што следуваат Вардарскиот, 37, Југоисточниот, 34, Пелагонискиот 30, ... Најмалку дозволи за градба и во октомври има во Североисточниот, каде биле издадени 13.

Од вкупниот број на издадени одобренија за градење, 187 (57.5 проценти) се наменети за објекти од високоградба, 80 (24,6 проценти) за објекти од нискоградба и 58 (17,8 проценти) за објекти за реконструкција.

На 175 (53.9 проценти) од објектите инвеститори се физички лица, а на 150 (46.1 процент)
се деловни субјекти.

Во извештајниот период е предвидена изградба на 790 станови, со вкупна корисна површина од 71 091 метри квадратни.

Во Скопскиот регион ќе се градат 323 нови станови,  од кои 194 во Општина Гази Баба, 53 во Центар, 51 во Петровец. Во Вардарскиот регион, пак, ќе се градат 209 нови станови, од кои 206 се во Општина Кавадарци. Нови 100 станови ќе има и во Полошкиот регион, од кои половината во Гостивар. лв/бак/

Фото: МИА архива