Скопје, 9 април 2025 (МИА) - Општина Кисела Вода информира дека се врши целосно асфалтирање на нова улица во населбата Драчево, која првпат овозможува директно поврзување меѓу две значајни сообраќајни артерии – улиците „Румена Хаџипанзова“ и „Киро Фетак“.

Како што наведуваат од општината, станува збор за делница во должина од околу 900 метри, која претставува важно логистичко и сообраќајно олеснување за жителите на Драчево, но и за сите кои секојдневно се движат низ овој дел на општината. Со ова поврзување се овозможува побрз и побезбеден проток на сообраќајот, подобра комуникација помеѓу урбаните целини, но и значително намалување на сообраќајниот метеж во овој дел на Кисела Вода.

-Со ова ново поврзување меѓу улиците „Румена Хаџипанзова” и „Киро Фетак”, правиме сериозен чекор напред во унапредувањето на сообраќајот во Драчево. Овој зафат е само уште еден доказ за решеноста на локалната самоуправа да ја трансформира Кисела Вода во модерна урбана средина со целосно решена инфраструктура и поквалитетен живот за сите нејзини жители, изјави градоначалникот Орце Ѓорѓиевски.

Општина Кисел Вода соопшти дека асфалтирањето на оваа нова улица е во рамки на интензивирањето на градежните активности за подобрување на патната инфраструктура во Општината. вг/лв/

Фото: Општина Кисела Вода