Македонска Каменица, 28 номври 2025 (МИА) - Во КИЦ „Романса“ во Македонска Каменица, вечер во 19 часот ќе бидат доделени наградите на годинешните добитници од Меѓународниот фестивал „Јаков од Камена Река“. Меѓу наградените е и академик Драган Даутовски, кој по свечената церемонија ќе одржи мини-концерт во траење од триесет минути. Публиката ќе има можност да ужива и во настапот на Игор Трпчески, кој ќе интерпретира слем-поезија. Имињата на добитниците ќе бидат официјално објавени вечерва.

Директорот на фестивалот, Миле Ѓорѓијоски, изрази задоволство од присуството на долгогодишните соработници, меѓу кои и Ивана Брезовац од Загреб и Христина Деолска, советник за литература и стручен соработник на фестивалот.

Претседателката на Заедницата на Македонците во Загреб, Ивана Брезовац, истакна дека активностите на македонската заедница во Хрватска продолжуваат да придонесуваат за зачувување и афирмација на македонскиот јазик и култура.

-Како што можете да видите, заедницата на Македонците и Македонското културно друштво повторно се докажуваат во зачувувањето и афирмацијата на македонскиот јазик и култура во Хрватска. Имаме поддршка од Министерството за образование на Република Хрватска и помош од сите институции, но најважна е соработката со Република Македонија. Меѓународниот фестивал „Јаков од Камена Река“ ја препозна нашата заложба и природно е што се поврзуваме. Македонците ширум светот ја вршат својата функција – се трудиме да го зачуваме нашето македонско, рече Брезовац.

Христина Деолска, советник за литература и стручен надворешен соработник на фестивалот, информира дека пред фестивалот традиционално бил распишан и конкурс за краснопис.

-Овој пат работилницата и доделувањето на наградите од конкурсот ќе се одржат на 18 декември во Винчини, во Виница. Сите што се заинтересирани да ги видат работилниците, изложбата од најдобрите трудови и да учествуваат во активностите се добредојдени. Дополнително ќе биде објавено точното време,“ изјави Деолска.

Фестивалскиот директор Ѓорѓијоски најави дека ќе бидат доделени 12 награди, како и секоја година. Посебно признание ќе добие Гоце Панговски, гостин од САД, за неговиот придонес во промоција на македонската историја, јазик и култура во дијаспората. Според извештаите од библиотеките, најчитан автор за годината е Далибор Трајков, кој и минатата година ја носеше истата титула.

-Трајков е веќе повеќе од десет години меѓу најчитаните автори. Се надеваме дека следната година ќе се истакне и некој друг, но неговиот квалитет како писател е неспорен,“ додаде Ѓорѓијоски.

Тој ги покани сите граѓани да присуствуваат на вечерната свеченост во КИЦ „Романса“. вс/дма/

Фото: МИА