Во Битола врачена наградата за животно дело на актерот Петар Мирчевски
- Градоначалничката на Општина Битола Наташа Петровска вечерва на актерот Петар Мирчевски му ја врачи наградата за животно дело која традиционално се доделува на празникот на градот, 4 Ноември.
![Во Битола врачена наградата за животно дело на актерот Петар Мирчевски](https://mia.mk/images/20221108215041_big_730x400_49.webp )
Битола, 3 октомври 2021 (МИА) - Градоначалничката на Општина Битола Наташа Петровска вечерва на актерот Петар Мирчевски му ја врачи наградата за животно дело која традиционално се доделува на празникот на градот, 4 Ноември.
Свеченоста се одржа во новиот, реконструиран импозантен објект, Офицерски дом во Битола кој по долго време вечерва ги отвори вратите на посетителите.
-Битолчани од денес го имаат својот објект, Офицерскиот дом кој постојано ќе биде отворен. Ова е почеток на нови бројни настани, а првиот беше посветен на добитникот на наградата за животно дело, актерот Петар Мирчевски. Со овој настан се става печат на мојот мандат, бев посветена за овој објект и еве Офицерскиот дом го отворивме на празникот на градот, рече меѓудругото Петровска.
Наградата за животно дело е големо признание и затоа се поклонувам на публиката, се поклонувам на битолчани, посочи актерот Петар Мирчевски.
-Горд сум што можев на својот мајчин македонски јазик да го промовирам мојот матичен театар, мојот град и мојата земја. Благодарам на публиката која секогаш ме поддржува и мотивира. Ви се поклонувам, рече Мирчевски.
Празникот на градот го честита и новоизбраниот градоначалник на Битола Тони Коњановски.
-Сакам посреќна Битола и затоа ќе работам на тоа да се врати насмевката на битолчани. Прекрасен е Офицерскиот дом и ние ќе се грижиме за правилна намена и програмски да живее и функционира овој објект, истакна Коњановски.
Празничната програма по повод 4 Ноември Денот на ослободувањето на Битола продолжува утре претпладне со полагање цвеќе на партизанските гробишта и средба на градоначалничката Петровска со претставници на Сојузот на борците од тој град. мт/аа/
![Петровска](/articles/images/%d0%b2%d0%be-%d0%b1%d0%b8%d1%82%d0%be%d0%bb%d0%b0-%d0%b2%d1%80%d0%b0%d/kP2kMu57e/placeholder.webp?use_watermark=0)
![Тони Коњановски](/articles/images/%d0%b2%d0%be-%d0%b1%d0%b8%d1%82%d0%be%d0%bb%d0%b0-%d0%b2%d1%80%d0%b0%d/bjZV4taUa/placeholder.webp?use_watermark=0)