Скопје, 24 февруари 2021 (МИА) - Македонскиот ракометен првак Вардар 1961 вечерва триумфираше во Скопје над Елверум со 35:32 (17:20), забележувајќи ја првата победа во Лигата на шампиони по повеќе од четири месеци. Ракометарите на Вардар беа во негатива по првиот дел, што Елверум го доби со 20:17, одржувајќи ја предноста до 41 минута, кога македонскиот првак за кратко го презеде водство со 25:24. Натпреварот во салата „Јане Сандански“ влезе во неизвесен финиш и на три минути пред крајот, резултатот беше израмнет 32:32. Норвешкиот првак не успеа да ги реализира последните три напади, додека на спротивната страна Гоце Георгиевски, Иван Чупиќ, од седум метри, и Тимур Дибиров беа прецизни за прва победа на Вардар од 15 октомври лани, кога „црвено-црните“ на истиот терен го совладаа Фленсбург со 31:26. Најефикасен во редовите на Вардар вечерва беше Тимур Дибиров со девет голови. Со вториот триумф во групата А, Вардар му го препушти последното место на табелата на Елверум, и со шест бодови од десет натпревари го пречекува следниот противник Мешков Брест, во Скопје на 4 март. ег/оџ/