Делчево, 30 јуни 2025 (МИА) – Женскиот кошаркарски прволигаш Патриот 2016 од Делчево денеска соопшти дека се засилува со бугарската интернационалка Маги Чипова.

Станува збор за 26-годишна кошаркарка со богато меѓународно искуство, висока 186 сантиметри, која покрива повеќе позиции – тројка, четворка и петка. Од клубот информираат дека нејзината флексибилност и искуство ќе претставуваат големо засилување за тимот во пресрет на новата сезона.

-Маги Чипова досега има настапувано за повеќе реномирани клубови во Бугарија и Европа, меѓу кои се Асеновец, Славија Софија, Септември Софија, Рилски Самоков, Спартак Пловдив, како и Аријано Ин Пино од Италија, велат од управата на клубот.

Со ангажманот на Чипова, КК Патриот 2016 испраќа јасна порака за сериозни амбиции во претстојната сезона.

-Маги е играч со искуство и огромен потенцијал. Веруваме дека ќе биде вистинско освежување во нашата игра и ќе ѝ помогне на екипата да ги исполни поставените цели. Ѝ посакуваме успешна сезона, многу победи и што повеќе заеднички успеси во дресот на Патриот, наведуваат од клубот.

Од Патриот 2016 најавуваат и дополнителни засилувања во периодот што следи. вс/лв/

 Фото: МИА