Скопје, 28 август 2026 (МИА) - Во студиото Приватен принт во Скопје со почеток во 20 часот е закажано отворањето на „Над сè“, аудиовизуелен есеј и просторна инсталација на шпанската уметница Енар де Диос Родригез.

Поставката ќе биде проследена со уметнички разговор меѓу уметницата и Софија Григоријаду, уметница, антропологина, кураторка и едукаторка од Атина и Скопје.

Изложбата ќе може да се погледне до 19 септември, од среда до петок, од 13 до 18 часот или со најава.

Енар де Диос Родригез е визуелна уметница од Шпанија со седиште во Виена, Австрија, чија практика ги истражува пресеците на економските, социополитичките, историските и еколошките сили. Работејќи преку видео, фотографија и инсталација, таа ги истражува начините на кои териториите се произведуваат, контролираат и трансформираат, привлекувајќи внимание кон инфраструктурите и технологиите што го обликуваат современиот живот. Во 2024 година, заедно со Андреа Стивс, таа е коавтор на книгата „Let It Return“, објавена од Приватен принт.

„Светло минато е пред нас“ (A Bright Past Is Ahead of Us), издание 2026, е кофинансирано од Министерството за култура и туризам на Северна Македонија и Амбасадата на Шпанија во Македонија.

Програмата „Разговори со уметници“ е курирана од Јана Старделова и организирана во соработка со Tiiiit! Inc. Skopje, а поддржана од Kvinna till Kvinna и Амбасадата на Шведска во Македонија. нд/

Фото: Плакат