Манчестер, 28 февруари 2025 (МИА) - Менаџерот на Манчестер Јунајтед, Рубен Аморим го бранеше капитенот на тимот, Бруно Фернандеш по критиките што му ги упати легендата на клубот - Рој Кин.

Кин, кој беше капитен на „црвените ѓаволи“ на почетокот на векот, уште еднаш го прекори Фернандеш за неговото однесување на теренот поради честите гестикулации со рацете и расправии со судиите. Зборовите на Ирецот дојдоа веднаш по победата на Манчестер Јунајтед со 3-2 над Ипсвич Таун, во која Фернандеш беше прогласен за „Играч на натпреварот“.

-Само талентот не е доволен. Бруно е талентиран фудбалер, но само тоа не е доволно, рече Кин во поткастот „Да се ​​држиме до фудбалот“, во кој заедно со поранешниот напаѓач на Арсенал, Иан Рајт, е домаќин.

Аморим, сепак, не се согласува со она што го кажа Кин на прес-конференцијата пред натпреварот од ФА Купот со Фулам.

-Слушнав што рече Кин. Сепак, моето мислење е различно. Бруно е многу важен играч за клубот. Тој игра добро во тешка ситуација. Тој секогаш ја презема одговорноста. Знам дека понекогаш премногу мавта со рацете за капитен, но мислам дека тоа е израз на неговата фрустрација од она што се случува во последните години. Тој секогаш сака да победува и понекогаш е тешко да се контролира таа иритација. Секој има право на свое мислење. Рој Кин има многу високи стандарди поставени за време на неговата кариера. Затоа зборува јавно. Но, моето мислење не се совпаѓа со неговото и мислам дека тоа е поважно во моментов бидејќи јас сум менаџер, додаде португалскиот стручњак.

Аморим исто така беше запрашан дали мисли дека играчите треба да научат подобро да ги толерираат критиките што ги добиваат на социјалните мрежи.

-Мислам дека е доволно тешко за фудбалерите. Можете да речете слаба волја, но тие се под притисок со кој е тешко да се справите. Потребна им е помош. Во модерниот фудбал тие мора да бидат подготвени за оваа критика, објасни тој.

Од Португалецот беше побарано и да ја разјасни ситуацијата со напаѓачот Алехандро Гарначо. Аргентинецот беше заменет во финишот на првото полувреме од мечот со Ипсвич по црвениот картон на Патрик Доргу и веднаш се упати кон соблекувалната. По мечот, тој објави и фотографија на социјалните мрежи на која, и покрај победата, не изгледаше особено среќно.

-Гарначо сам дојде во мојата канцеларија. Истражував што точно се случи. Се врати во соблекувалната, таму го гледаше натпреварот и потоа си отиде директно дома. За мене тоа не е проблем, но во Манчестер Јунајтед се станува проблем. Во овој клуб секоја перцепција е важна. Сега тој ќе треба да ја плати сметката на следната вечера на нашиот тим. Тоа е тоа, заклучи Аморим. дс

Фото: Архива