Rafah, 7 maj 2024 (MIA) - Fondi për fëmijë i Kombeve të Bashkuara (UNICEF) ka paralajmëruar se 600.000 fëmijë në Rafah nuk kanë ku të shkojnë për të qenë të sigurt në rast të një sulmi izraelit dhe shpërngulje të detyrueshme në qytetin në jug të zonës së bllokuar të Rripit të Gazës.

Armata izraelite lëshoi ​​një urdhër evakuimi emergjent për palestinezët në lagjet lindore në Rafah dhe u kërkoi atyre të zhvendosen në qytetin al-Mavasi në jug.

“UNICEF bën thirrje për mbrojtjen e civilëve dhe infrastrukturës që mbështet nevojat e tyre themelore, si spitalet dhe strehimoret”, thuhet në kumtesën e agjencisë së KB-së.

Situata humanitare në Gazë po përkeqësohet, ndërsa UNICEF-i deklaroi se sulmi në Rafah do të ketë pasoja katastrofale për të paktën 600.000 fëmijë.

"Rafa tani është një qytet ku fëmijët nuk kanë ku të shkojnë për të qenë të sigurt në Gazë", tha Ketrin Rasel, drejtore ekzekutive e UNICEF-it.

Ajo deklaroi se disa nga këta fëmijë janë zhvendosur disa herë dhe kanë humbur shtëpitë dhe familjet e tyre, duke theksuar nevojën për t'i mbrojtur ata.

Në komunikatë theksohet se në Rafah për momentin ka 78.000 fëmijë nën moshën dy vjeç dhe 175,000 fëmijë nën moshën pesë vjeç, me çka 8.000 fëmijë deri në moshën dy vjeç përballen me kequshqyerje akute dhe 65.000 fëmijë me aftësi të kufizuara. 

Foto: arkivi i MIA-s