Uashington, 10 qershor 2024 (MIA) - SHBA ka kërkuar votim në Këshillin e Sigurisë së KB-së mbi draft-rezolutën e saj me të cilin mbështetet miratimi i planit për “armëpushim të menjëhershëm me lirimin e pengjeve” ndërmjet Izraelit dhe Hamasit, bëjnë të ditur mediat amerikane.

Burime diplomatike kumtuan se votimi është planifikuar për sot, por ende nuk është konfirmuar nga Koreja e Jugut e cila kryeson Këshillin e Sigurisë për muajin qershor.

"SHBA ka ftuar që Këshilli i Sigurisë të kalojë në votim ... duke mbështetur propozimin në tavolinë", tha Nejt Evans, zëdhënës i delegacionit amerikan pa precizuar datë votimi.

"Anëtarët e Këshillit nuk duhet ta lejojnë këtë mundësi të kalojë dhe duhet të flasin njëzëri në mbështetje të kësaj marrëveshje", tha Evansi.

SHBA janë kritikuar për bllokimin e disa draft-rezolutave të KB-së që bëjnë thirrje për armëpushim në Gazë.

Presidenti amerikan Xho Bajden më 31 maj filloi një presion të ri për marrëveshje për armëpushim dhe lirimin e pengjeve.

Sipas propozimit, Izraeli do të tërhiqet nga qendrat e populluara në Gazë, ndërsa Hamasi do të lirojë pengjet. Armëpushimi fillimisht do të zgjasë gjashtë javë dhe do të vazhdohet pasi negociatorët kërkojnë përfundim të përhershëm të armiqësive.