Shkup, 21 mars 2024 (MIA) - Zyra e OSBE-së për instituticione demokratike dhe të drejta të njeriut (ODIHR) sot hapi misionin vëzhgues në Maqedoninë e Veriut për zgjedhjet presidenciale të cilat do të mbahen më 24 prill dhe zgjedhjet parlamentare të caktuara më 8 maj, që zbatohet me ftesë të autoriteteve në vend. 

Shefja e misionit, ambasadorja e Kanadasë, Xhilian Stark në konferencën e sotme për media në Shkup theksoi se këto janë zgjedhjet e 22-ta në Maqedoninë e Veriut të cilat i vëzhgon ODIHR. Zgjedhjet e fundit të cilat i vëzhguan ishin zgjedhjet lokale në vitin 2021. 

"ODIHR punon në përputhje me metodologjinë institucionale për vëzhgimin e zgjedhjeve. Ne jemi plotësisht të paanshëm dhe bazohemi në fakte. Në kuadër të misionit do të bëhet vlerësim nëse zgjedhjet janë në përputhje me angazhimet e OSBE-së dhe detyrime të tjera ndërkombëtare, si dhe me legjislacionin kombëtar. Kemi ekip kyç prej 12 ekspertëve ndërkombëtarë në Shkup nga 12 vende pjesëmarrëse në OSBE. Bëhet fjalë për grup shumë të larmishëm. Do të jemi në vend edhe për zgjedhjet presidenciale dhe parlamentare dhe do të largohemi më 19 maj", tha ambasadorja Stark. 

Përveç ekipit kryesor, do të ketë grup të vëzhguesve afatgjatë, gjithsej 20 persona të cilët do të shpërndahen në vend në ekipe nga dy edhe atë në Tetovë, Ohër, Manastir, Prilep, Strumicë, Koçan, Kumanovë dhe Shtip, ndërsa dy ekipe do të ketë në Shkup. 

"Ne gjithashtu kërkuam edhe 300 vëzhgues në afat të shkurtë të cilët duhet të mbërrijnë para zgjedhjeve. Disa ditë para zgjedhjeve do të shkojnë në vendet e votimit, do t'i vëzhgojnë votuesit dhe procesin e numërimit të votave dhe grumbullimit të rezultateve. Ata do të vijnë pak para zgjedhjeve, 24 prill dhe 8 maj", shtoi ambasadorja Stark.

Në pyetjen e gazetarëve nëse shumë vonë ishin miratuar rekomandimet e OSBE/ODIHR që kanë të bëjnë me disa nga ndryshimet e Kodit Zgjedhor, duke pasur parasysh se ato ishin miratuar para vetëm dy javëve dhe nëse kanë kohë që të përgatiten institucionet, shefja e misionit vëzhgues thotë se ende janë në fazën e analizës. 

"Ne kemi pasur takim fillestar me KSHZ-në, por kjo është dita jonë e parë e punës si mision vëzhgues, prandaj po fillojmë me këto vlerësime. Jemi në dijeni të punës dhe rekomandimeve të mëparshme, por ende nuk kemi bërë një vlerësim të plotë. Jemi ende në fazën e analizës, por sigurisht kjo është një nga gjërat që do të analizohet në kuadër të misionit tonë monitorues, pra nëse janë marrë parasysh rekomandimet e mëparshme", tha ambasadorja Stark.

Lidhur me atë nëse me të vërtetë është rritur numri i vëzhguesve dhe a kanë njohuri se priten konflikte, Stark theksoi se numri i vëzhguesve bazohet në rekomandimet e misionit për vlerësim të nevojave pas vizitës së realizuar në janar të këtij viti. 

"Ka dy lloje të zgjedhjeve të cilat ndodhin në ditë të njëjtë, prandaj nuk është e jashtëzakonshme të kemi numër të madh të vëzhguesve dhe kërkojmë numër të madh të vëzhguesve përgjatë dy llojeve të nevojave. Siç thashë, kjo bazohet në rekomandimet e misionit për vlerësim të nevojave", thotë shefja e misionit vëzhgues, ambasadorja Stark. fc/

Fotografia: Arkivi i MIA-s