Shkup, 20 qershor 2024 (MIA) - Ministria e Ekonomisë, në përputhje me Ligjin për praktika të padrejta tregtare, tashmë ka miratuar listën e produkteve që duhet të kontribuojnë shtresë për uljen e inflacionit, veçanërisht në pjesën e produkteve ushqimore bazë , informoi ministri resor, Kreshnik Bekteshi.

"Me propozim të Ministrisë së Ekonomisë janë marrë 25 vendime për kufizimin e çmimeve të produkteve ushqimore bazë, kufizimin e marzhit të produkteve të caktuara, si dhe heqjen e detyrimeve doganore për disa produkte ushqimore, të gjitha me qëllim të mbrojtjes së standardit të jetesës së qytetarëve nga kriza e çmimeve. Si rezultat i masave që morëm, arritëm të ulim inflacionin për një vit nga 19,5 për qind në nëntor 2022 deri në 3,1 për qind në fund të vitit të kaluar. Për këtë qëllim, për herë të parë në vend u miratua edhe Ligji për praktikat e padrejta tregtare. Me kontratat e reja që do të kenë furnitorët dhe prodhuesit me shitësit me pakicë pas miratimit të listës, të cilat tashmë duhet t'i dakordojnë, inflacioni i produkteve ushqimore bazë duhet të ulet edhe më tej dhe të jetë nën 2 për qind në muajt në vijim", tha Bekteshi në konferencën e sotme për shtyp në të cilën beri llogaridhënie për udhëheqjen e tij të Ministrisë.

Në shtatë vitet e fundit, siç tha, janë miratuar dhjetëra ligje, qindra akte nënligjore, rregullore, mijëra zgjidhje me qëllim të përmirësimit të klimës së biznesit në vend.

"Me ndryshimet ligjore në sektorin e energjisë bëmë reforma kyçe për stabilitetin energjetik në vend, ndërsa me ndryshimet ligjore për mbështetjen e investimeve hapëm rrugën për rritje dhe zhvillim edhe më të madh të ekonomisë. Me reformat themelore që bëmë në shtatë vitet e kaluara, por edhe në periudhën e kaluar të krizës shëndetësore, energjetike, të çmimeve  dhe ekonomike, luftuam për të mbajtur çdo vend pune dhe për të siguruar kushte më të mira jetese për të gjithë qytetarët", tha Bekteshi.

Në fushën e energjetikës, theksoi se ka filluar një cikël i ri investimi në fushën e burimeve të rinovueshme të energjisë (BRE), i cili rezultoi me rritje të ndjeshme dhe ndërtimin e termocentraleve për prodhimin e energjisë elektrike nga BRE, veçanërisht në fushën e fotovoltaikëve kapaciteti i instaluar i të cilëve prej 20 megavat në vitin 2017 është rritur në 600 megavat dhe tashmë janë dhënë licenca për 1311 megavat. Kjo kontribuoi në pjesëmarrjen e BRE-ve në prodhimin e përgjithshëm të energjisë elektrike me 33 për qind, për dallim nga viti 2017 kur ishte nën 20 për qind.

Përmes Ligjit për mbështetje financiare të investimeve, shtoi, janë mbështetur gjithsej 919 kompani të huaja dhe vendore të cilat në gjashtë vitet e fundit kanë investuar mbi 500 milionë euro dhe për to janë paguar 100 milionë euro mbështetje financiare shtetëtore.

"Mbështetja për turizmin është rritur në mënyrë drastike, veçanërisht përmes masës për vauçerët për turizmin e brendshëm, përmes së cilës kemi mbështetur edhe kapacitetet e turizmit vendas. Nga zbatimi i kësaj mase në vitin 2018, deri më tani Ministria e Ekonomisë ka dhënë një mbështetje totale prej 770 milionë denarë dhe janë lëshuar më shumë se 120 mijë vauçera turistikë për punëtorët me të ardhura të ulëta", tha Bekteshi.

"Përmes programeve për përkrahje të ndërmarrësisë dhe inovacionit në ndërmarrjet e vogla dhe të mesme, për shtatë vjet është dhënë gjithsej 202 milionë denarë, ndërsa janë mbështetur 1.923 kompani përmes masave për përkrahje të ndërmarrësisë femërore, certifikimit, projekteve dhe aktiviteteve programore të fondacioneve, shoqatave, odave ekonomike, rrjeteve të biznis engjëjve. Përmes programeve për përkrahje të industrisë prodhuese dhe përgjegjësisë sociale janë realizuar masa në vlerë prej 61,3 milionë denarë dhe janë mbështetur 190 kompani, klastera dhe shoqata për trajnimin e punëtorëve në industri, specializim i mençur, akreditim i laboratorëve dhe futjen e standardeve", tha Bekteshi dhe shtoi se mbi 50 dyqane nga Çarshia e Shkupit kanë marrë gjithsej 4 milionë denarë mbështetje financiare për unifikimin e vitrinave të tyre. ls/

Foto: MIA