Shkup, 12 prill 2024 (MIA) - Nga 5 deri më 11 prill janë regjistruar 44 raste të reja me kollë të mirë, me një rënie prej 10,0 për qind në krahasim me shtatëditorin e kaluar. Shumica e rasteve janë raportuar në Shkup. Raste janë raportuar edhe në Manastir - katër dhe një rast në Kumanovë, Kratovë dhe Kriva Pallankë. Mosha e pacientëve varion nga një muaj deri në 75 vjeç, ndërsa numri më i madh i rasteve janë nga grupmosha 10 deri në 14 vjeç. Nga 44 rastet e reja, dy janë shtruar në spital, theksohet në raportin e fundit të Institutit të Shëndetit Publik (ISHP), të publikuar pasditen e sotme.

"Deri më 11 prill, në Maqedoninë e Veriut janë regjistruar gjithsej 443 raste të kollës së mirë, me një incidencë prej 24,1/100,000 banorë. Sa i përket vendbanimit, numri më i madh i banorëve jetojnë në Shkup - 355 ose 80,1 për qind, duke zënë gjashtëmbëdhjetë komuna të ndryshme. Janë raportuar 25 persona nga territori i QSHP Kumanovë, 19 nga QSHP Manastir, 17 persona nga QSHP Tetovë, pesë nga QSHP Gostivar dhe nga tre raste nga QSHP Koçani dhe Kratovë. Nga dy raste janë regjistruar në Kriva Pallankë, Dibër, Strugë, Probishtip, Veles dhe Strumicë, dhe nga një në Kërçovë, Prilep, Kavadar dhe Gjevgjeli", shkruhet në raport.

Nga numri i përgjithshëm i rasteve të regjistruara - 433, 263 ose 59,4 për qind ishin të pa vaksinuar, nuk janë të vaksinuar plotësisht sipas moshës ose nuk ka dëshmi të vaksinimit. Nga rastet që janë vaksinuar plotësisht, koha mesatare e kaluar nga doza e fundit e vaksinës deri në sëmundje është 12,9 vjet.

Nga të sëmurët, 60 persona u shtruan në spital, 49 prej tyre nën moshën katër vjeç.

Në periudhën nga 18 janari deri më 11 prill janë dhënë gjithsej 39,031 doza vaksine që përmban një komponent kundër kollës së mirë. ls/

Foto: Arkivi i MIA-s