Амстердам, 16 декември 2025 (МИА) - Властите на Лимбург, на југот на Холандија, убија речиси 250 ракуни во 2024 и 2025 година, па сега бројот на овој вид во покраината се проценува на 50 до 100 единки.

Националната влада ги смета ракуните за „проблематичен вид“ со цел нула популација. Извештајот содржи 11 стратегии за контрола и открива дека околу половина од нив се ефикасни, но експертите велат дека е потребна координација со Германија и Белгија за трајни резултати. Службениците планираат две пилот-зони за гранично и меѓугранично управување - едната по германската граница, а другата по границата со Германија и Белгија.

„Секој ракун е еден ракун премногу“, соопшти покраината, нагласувајќи дека соседните земји мора да ги засилат напорите за спречување на повторна наезда.

Ракуните се сештојади, ги истиснуваат загрозените животни и можат да пренесуваат болести на луѓето.

Службеникот на покраината Лимбург, Леон Фасен рече дека употребата на „паметни“ стапици, убивањето од страна на специјални тимови и ловци, би понудила најдобра шанса за делотворно намалување на популацијата и нејзино приближување до нула. Паметните стапици вклучуваат уреди што им овозможуваат само на ракуните да стигнат до мамката - со препознавање слики што се активираат само за ракуни, а не за зајаци или верверички.  си/сд/

Фото: Пиксабеј