Shkup, 12 gusht 2026 (MIA) - Shpallja e epidemisë së Etheve të Nilit Perëndimor në një vend të caktuar do të thotë se është përcaktuar përhapja e infeksionit në atë zonë dhe se rreziku për popullsinë është më i lartë se zakonisht. Shpallja e epidemisë është kryesisht një masë e shëndetit publik dhe administrative për menaxhimin e organizuar të një sëmundjeje ngjitëse, dhe jo domosdoshmërisht shenjë se ekziston rrezik i menjëhershëm për popullsinë. Kjo nuk do të thotë se të gjithë banorët janë të infektuar, as nuk do të thotë automatikisht se vendi është i mbyllur ose se ka karantinë.

Shpallja e një epidemie në vendin tonë rregullohet me Ligjin për Mbrojtjen e Popullsisë nga Sëmundjet Ngjitëse, i cili përcakton masa për parandalimin e shfaqjes, zbulimin e hershëm, parandalimin e përhapjes dhe shtypjen e sëmundjeve ngjitëse dhe infeksioneve, të drejtat dhe detyrimet e institucioneve shëndetësore, personave juridikë dhe individëve, si dhe mbikëqyrjen e zbatimit të masave, me qëllim mbrojtjen e popullatës nga sëmundjet ngjitëse.

Neni 56 i Ligjit thotë se në rast të një epidemie në një zonë për të cilën është krijuar një institut i mbrojtjes shëndetësore, instituti kompetent shpall epideminë. Në rast se ekziston rreziku që epidemia dhe sëmundjet ngjitëse të përhapen në zona të tjera, Ministria shpall epideminë dhe vendos masa për t'i shtypur ato.

Megjithatë, Neni 57 thotë se në rast të një epidemie, si dhe në rast të fatkeqësive të mëdha natyrore dhe fatkeqësive të tjera që mund të shkaktojnë epidemi të një sëmundjeje ngjitëse, mund të urdhërohen masat e përkohshme të mëposhtme:
"1) detyrimi i punonjësve të kujdesit shëndetësor dhe bashkëpunëtorëve të kujdesit shëndetësor për të kryer aktivitete shëndetësore në kushte emergjente;
2) kufizimi i së drejtës për grevë;
3) sigurimi dhe përdorimi i ambienteve të punës dhe të tjera, pajisjeve, ilaçeve dhe mjeteve të transportit për kryerjen e aktiviteteve shëndetësore;
4) përcaktimi i detyrave të veçanta të institucioneve të kujdesit shëndetësor dhe
5) masa të tjera të përcaktuara nga ky ligj."

Masat nga paragrafi 1 i këtij neni zgjasin derisa ekziston rreziku nga përhapja e epidemisë. Qeveria e Republikës së Maqedonisë me propozim të Ministrisë vendos cilat nga masat nga paragrafi 1 i këtij neni do të zbatohen dhe për cilën periudhë kohore". 

Zakonisht, pas shpalljes së një epidemie, autoritetet shëndetësore intensifikojnë mbikëqyrjen dhe testimin epidemiologjik; marrin masa për të parandaluar përhapjen e mëtejshme; kryejnë dezinfektimin, nëse është  sëmundje që transmetohet nga mushkonjat; lëshojnë rekomandime ose urdhra për të mbrojtur popullatën; dhe sigurojnë kapacitete dhe burime të mjaftueshme në institucionet shëndetësore.

Meqenëse Ethet e Nilit Perëndimor transmetohen nga mushkonjat e infektuara, masat mund të përfshijnë rritjen e kontrollit dhe shfarosjes së mushkonjave, heqjen e ujit të ndenjur dhe rekomandime për qytetarët që të përdorin mjete për mbrojtje.

Epidemia e Etheve të Nilit Perëndimor prej dje është shpallur në komunat e Shkupit - Kisella Vodë, Gazi Babë, Aerodrom, Butel dhe Ilinden. Autoritetet shëndetësore sigurojnë se nuk ka vend për panik dhe bëjnë thirrje që të respektohen masat për mbrojtje personale. 

Në vend, që nga fillimi i vitit janë evidentuar 26 pacientë të sëmurë nga Ethet e Nilit Perëndimor, ndërsa një i sëmurë ka ndërruar jetë. fc/