Berlin, 24 shkurt 2025 (MIA) - Ministri gjerman i Punëve të Jashtme, Johan Vadeful deklaroi dje se ishte i hapur në parim për bisedime me Moskën për një paqe të qëndrueshme në Ukrainë, por përjashtoi mundësinë e bërjes së lëshimeve ndaj Rusisë.

"Ukraina, sigurisht, duhet të flasë e para. Por edhe ne jemi të gatshëm të flasim", tha Vadeful në forumin "Kafe Kiev" të organizuar nga Fondacioni Konrad Adenauer në Berlin.

"Por ne nuk do të mbërrijmë në Moskë dhe të bëjmë lëshime shtesë. Ne nuk do ta bëjmë këtë", shtoi ai. "Nëse ndalen të shtënat, nëse ka një gatishmëri serioze për të folur, atëherë sigurisht që do të përfshihemi".

"Por ne nuk po ia kërkojmë, për ta thënë troç", tha Vadeful, duke iu referuar presidentit rus Vladimir Putin. "Ne presim që në një moment të caktuar të pranohet një nga propozimet e arsyeshme".

Vadeful, nga Demokratët e Krishterë Konservatorë (CDU), hodhi poshtë thirrjet nga disa anëtarë të Social Demokratëve të qendrës së majtë për t'iu afruar Putinit me propozime të reja për armëpushim.

"Nuk ka mungesë kanalesh komunikimi. Por kanali është i padobishëm nëse ai nuk dëshiron të flasë", tha Vadeful. mb/

Foto: DPA