Uashington, 20 shkurt 2026 (MIA) - Presidenti amerikan Donald Trump po mendon për një sulm të kufizuar ushtarak ndaj Iranit për të ushtruar presion mbi Teheranin që të pranojë kërkesat e Uashingtonit në lidhje me marrëveshjen bërthamore, por theksoi se ai ende preferon një zgjidhje diplomatike, publikoi "Uollstrit zhurnall" duke iu referuar burimeve. 

Sipas burimeve të njohura me këtë çështje, sulmi i mundshëm fillestar do të synonte disa objekte ushtarake ose qeveritare dhe mund të kryhet brenda pak ditësh.

Nëse Irani nuk i plotëson kërkesat për të ndaluar pasurimin bërthamor, Shtetet e Bashkuara mund të nisin një fushatë më të gjerë që synon objektet e regjimit.

Trampi tha se vendimi për veprime të mëtejshme mund të merret "ndoshta në 10 ditët e ardhshme", ndërsa më vonë u tha gazetarëve se afati është maksimumi dy javë, duke thënë se SHBA-ja "do të bëjë marrëveshje ose do ta arrijnë atë në një mënyrë ose në një tjetër".

Zyrtarët thonë se Trampi ende nuk ka vendosur për ndonjë lloj sulmi dhe po i paraqiten mundësi që variojnë nga një valë e kufizuar sulmesh deri në një fushatë më të gjerë ushtarake.

Disa zyrtarë dhe analistë amerikanë kanë paralajmëruar se lëvizje të tilla mund të provokojnë hakmarrje iraniane dhe ta tërheqin SHBA-në në një konflikt më të gjerë në Lindjen e Afërt.

Nga ana diplomatike, përfaqësuesit amerikanë dhe iranianë u takuan këtë javë për bisedime.

Shtetet e Bashkuara të Amerikës po kërkojnë ndërprerjen e programit bërthamor të Teheranit, kufizime në programin e tij të raketave balistike dhe ndërprerjen e mbështetjes për grupet militante rajonale, ndërsa Irani mohon se po synon armë bërthamore dhe refuzon një marrëveshje gjithëpërfshirëse.

Lideri suprem i Iranit, Ali Hamnei ka kërcënuar se Teherani do t'i përgjigjet me forcën maksimale çdo sulmi të SHBA-së.

Ndërkohë, SHBA-ja ka vazhduar të vendosë forca ushtarake në rajon, duke përfshirë aeroplanë luftarakë F-35 dhe F-22, një aeroplanmbajtëse shtesë, aeroplanë për luftë elektronike, aeroplanë të komandës dhe kontrollit dhe sisteme të mbrojtjes ajrore. ls/

Foto: Arkiv