Shkup, 24 dhjetor 2025 (MIA) - Toleranca e kamerave nga sistemi "Qyteti i sigurt" do të jetë e njëjtë me atë që zbatohet tek radarët e tjerë të policisë, deklaroi ministri i Punëve të Brendshme, Pançe Toshkovski në një intervistë për televizionin Telma.

"Kjo do të thotë se për shpejtësi deri në 100 kilometra në orë do të ketë një tolerancë prej gjashtë kilometrash, për shpejtësi mbi 100 kilometra në orë tetë kilometra, ndërsa për shpejtësi mbi 200 kilometra në orë dymbëdhjetë kilometra", shpjegoi Toshkovski, duke shtuar megjithatë se nëse lejohet 50 km/orë, "Qyteti i sigurt" do të regjistrojë shkelje prej 57 km/orë.

Ministri theksoi se kjo tolerancë vlen ekskluzivisht për kundërvajtje, por nuk vlen në rastet kur kryhet një krim i lidhur me trafikun.

Toshkovski informoi se sistemi "Qyteti i sigurt" do t'i procesojë edhe automjetet zyrtare kur ato nuk veprojnë brenda kornizës së aktiviteteve të justifikuara operative,

"Kur automjetet zyrtare veprojnë brenda kornizës së aktiviteteve të tyre operative, ato nuk do të jenë në sistem, kur nuk veprojnë brenda kornizës së aktiviteteve operative, ato do të jenë. Kjo do të thotë që çdo automjet i ambulancës, zjarrfikësve, Ministrisë së Punëve të Brendshme, Ministrisë së Mbrojtjes, kur kryen aktivitete zyrtare nuk do të jetë pjesë e sistemit nëse kjo justifikohet në përputhje me përshtatshmërinë e veprimeve të tyre brenda kornizës së aktiviteteve të tyre zyrtare", theksoi Toshkovski.

Projekti "Qyteti i sigurt", së bashku me mirëmbajtjen e tij në periudhën nga viti 2008 deri në vitin 2025, u kushtoi qytetarëve rreth 85 milionë euro, theksoi ministri Toshkovski. Detajet rreth numrit dhe çmimit të kamerave mbeten të klasifikuara.

"Këto specifikime janë informacione të klasifikuara të sigurisë. Ajo që mund të them është se të tre kontratat, së bashku me mirëmbajtjen nga viti 2008 deri në vitin 2025, kushtojnë rreth 85 milionë euro", tha Toshkovski, duke shtuar se kontratat janë të klasifikuara në përputhje me ligjin.

Sipas tij, shuma e përgjithshme e shpenzuar gjatë 14 viteve është rreth një e pesta e shpenzimeve vjetore që shteti ka nga aksidentet rrugore.

Lidhur me ligjin që mbulon edhe projektin "Qyteti i sigurt", i cili kërkon një shumicë prej dy të tretash në Kuvend, Toshkovski tha se sipas mendimit të tij nuk ka deputet që nuk do ta mbështeste këtë projekt dhe theksoi se ai personalisht do të investojë në procesin e zbatimit të projektit, i cili beson se shpëton jetë. mb/

Foto: MIA