Kiev, 24 prill 2025 (MIA) - Kërkesat maksimaliste të Rusisë që Ukraina të tërheqë trupat e saj nga rajonet e saj, së bashku me sulmet brutale, tregojnë se Rusia, jo Ukraina, është pengesa për paqen, tha sot Ministri i Jashtëm ukrainas Andrij Sibiha.

"Moska, jo Kievi, duhet të jetë objekt presioni", tha Sibiha.

Sipas tij, kryeqyteti ukrainas ka përjetuar një natë veçanërisht të tmerrshme dhe tashmë ka raportime për nëntë civilë të vrarë në Kiev dhe më shumë se 70 të plagosur, duke përfshirë gjashtë fëmijë.

Sibiha vuri në dukje se qytete dhe komunitete të tjera anembanë Ukrainës u goditën nga raketat dhe dronët rusë në mes të natës, duke plagosur civilë.

"Me veprimet e tij, jo me fjalët e tij, presidenti rus Vladimir Putin po tregon se nuk respekton asnjë përpjekje për paqe dhe se kërkon vetëm të vazhdojë luftën. Dobësia dhe lëshimet nuk do ta ndalin terrorin dhe agresionin e tij. Vetëm forca dhe presioni", theksoi Sibiha. sa/

Foto: Arkivi i MIA-s