Shkup, 17 mars 2026 (MIA) - Ish kryetari i Qytetit të Shkupit dhe deputet i LSDM-së, Petre Shilegov, deklaroi sot se në përputhje me statutin e partisë, përjashtimin e një anëtari e kryen organizata komunale së cilës i përket dhe i bëri thirrje kryetarit të partisë, Venko Filipçe, nëse dëshiron të zbatojë një iniciativë të tillë, të vijë në organizatën në Karposh për të biseduar me anëtarësinë, e cila, siç tha, do të përpiqet të sigurohet që të jetë mjaftueshëm e madhe si për përjashtimin e tij ashtu edhe për largimin e Filipçes.

"Nëse e lexojnë statutin, për fat të keq, nuk ka askush në Bordin Ekzekutiv që ta lexojë, do t'u jetë e qartë se përjashtimin e një anëtari të LSDM-së e kryen organizata komunale së cilës i përket ai anëtar, të cilës kryetari Filipçe iu bashkua për herë të parë kur u zgjodh kryetar. Kështu që do ta shfrytëzoj rastin, nëse duan të zbatojnë një iniciativë të tillë, të vjen në komunën e Karposhit, do të bisedojmë me anëtarësinë atje, do të përpiqem të zhvillojmë një diskutim serioz, si për përjashtimin tim, ashtu edhe për largimin e tij. Sa i përket faktit që ata përfunduan, ai përfundoi me Petre Shilegovin, nuk do ta lejoj këtë. Gjithçka që kam bërë në jetën time profesionalisht, por edhe më shumë politikisht, atë që kam bërë për LSDM-në dhe atë që ende po bëj, nuk do të lejoj të njolloset nga një njeri që u zgjodh kryetar pa statut", tha Shilegov gjatë pushimit të seancës së sotme për zjarrin në diskoteken e Koçanit "Puls", ku ai përfaqëson një nga të pandehurit.

Shilegov shtoi se janë konfirmuar qëndrimet e tij, të shprehura në një intervistë për "Sitel" të dielën, se kjo udhëheqje e LSDM-së po punon tërësisht në marrëveshje me VMRO-DPMNE-në për interesat e partisë në pushtet, dhe jo për LSDM-në dhe anëtarësinë e saj.

"Thashë qartë se ekziston një marrëveshje, e cila përcakton që LSDM do të jetë në gjendjen në të cilën është, vazhdimisht do t'i anashkalojë temat dhe do t'i lejojë VMRO-DMNE-së të fitojë dy mandate, në këmbim të mos u nënshtrohet hetimeve të caktuara të mundshme ose çështjeve penale. Po ashtu është vërtetuar pretendimi im i dytë, se për fat të keq partia është plotësisht e shteruar në aspektin kadrovik dhe se njerëzit për të cilët LSDM do të thotë diçka dhe janë një faktor serioz në vendin tonë, nuk janë më aty", theksoi Shilegov.

Ai shtoi se platforma vazhdon, strategjia është duke u zhvilluar dhe përsëriti se do t'i kërkojnë këtij lidershipi të LSDM-së të largohet dhe ta lirojmë partinë politike.

"LSDM është një parti që krijoi një Maqedoni të pavarur, LSDM është një parti e mijëra, mijëra njerëzve të shquar. LSDM nuk është pronë e një grupi, kështu që ata duhet të bëjnë pazar me të për lirinë e tyre", tha Shilegov.

Kryetari i LSDM-së, Venko Filipçe, sot, në një konferencë për shtyp në selinë e partisë, duke shpjeguar vendimin e Bordit Ekzekutiv për të filluar procedurën për përjashtimin e Petre Shilegovit nga anëtarësimi në parti, deklaroi se vendimi është marrë me konsensus pasi, pas të gjitha verifikimeve dhe informacioneve të tyre, kanë arritur në përfundimin se ky është një proces pune për VMRO-DPMNE-në dhe një përpjekje për përçarje të brendshme të partisë.

Bordi Ekzekutiv i LSDM-së dje mori vendim dhe nisi procedurën për përjashtimin e Petre Shilegovit nga anëtarësimi në parti. sa/

Foto: MIA Arkivi