Bruksel, 3 mars 202 (MIA) -  Numri i azil-kërkuesve në Bashkimin Evropian, si dhe në Norvegji dhe Zvicër, vitin e kaluar përsëri ka rënë ndjeshëm, tregojnë të dhënat e publikuara sot.

Gjithsej, rreth 822,000 kërkesa janë regjistruar në 27 vende anëtare të BE-së dhe dy vendet partnere, që përbën një rënie prej 19 për qind krahasuar me vitin 2024, sipas raportit të Agjencisë së BE-së për Azil me seli në Maltë.

Rënia e madhe është kryesisht e nxitur nga ulja e kërkesave nga Siria. Rreth 42,000 sirianë kanë paraqitur kërkesë për azil në vitin 2025, krahasuar me 151,000 në vitin 2024. Kërkesat gjithashtu janë ulur edhe nga Bangladeshi, ku janë regjistruar 37,000 kërkesa, dhe nga Turqia me 33,000 kërkesa.

Në Siri, rrëzimi i presidentit Bashar al-Asad në dhjetor të vitit 2024 ndikoi tek shumë njerëz për shpresën për një të ardhme më të mirë, gjë që kontribuoi në uljen e numrit të azil-kërkuesve, sipas raportit.

Në të kundërt, numri i kërkesave nga Afganistani u rrit në 117,000, ndërsa kërkesat nga Venezuela u rritën në 91,000, transmeton DPA.

Rritja e kërkesave nga Venezuela i atribuohet pjesërisht rregullave më të rrepta të emigracionit në SHBA dhe kërkesave më të ashpra për viza për qytetarët e Venezuelës në vendet fqinje të Amerikës Latine.

Me 163,000 kërkesa, Gjermania edhe një herë ishte destinacioni kryesor, edhe pse ky numër është ulur për gati një të tretën krahasuar me vitin 2024. Gjermania, Spanja, Italia, Greqia dhe Franca kanë marrë numrin më të madh të kërkesave, që së bashku përbëjnë 80 për qind të të gjitha kërkesave të regjistruara për azil në BE, Norvegji dhe Zvicër në vitin 2025. qa/