Shkup, 25 dhjetor 2025 (MIA) - Propozim-ndryshimet e Ligjit për vlerën e shtuar me të cilën kërkohet prolongimi i afatit të TVSH-së nga 18 për qind për banesën e parë të blerë sot kaluan filtrin parlamentar të Komisionit të Financave dhe Buxhetit. 

Propozim-ndryshimet janë paraqitur nga grupi i deputetëve nga VMRO-DPMNE-ja dhe me ta kërkohet prolongimi i dispozitës për rritjen e TVSH-së nga pesë në 18 për qind nga 1 janari i vitit 2028. 

"Me ligjin, po e shtyjmë zbatimin e dispozitës e cila duhej të hynte në fuqi nga janari i vitit 2026, që do të thotë se TVSH-ja për banesën e parë do të mbetet 5 për qind në vend të 18 përqind sa duhej të ishte nga 1 janari i vitit 2026. Disa llogaritje të bëra nga kolegët tanë tregojnë se nëse doni të blini një banesë prej 70 metra katrorë në Shkup, mund të kurseni deri në 15 mijë euro me prolongimin e afatit", tha Bojan Stojanoski nga VMRO-DPMNE, i cili është një nga propozuesit.

Në seancën e sotme dritën jeshile e mori edhe Propozim-ligji për huamarrje nga Banka Evropiane për Rindërtim dhe Zhvillim për nevojat e Hekurudhave të Maqedonisë - Transporti.

Huaja është në shumën prej 20,9 milionë euro, të cilat duhet të përdoren për rinovimin e parkut të mjeteve ngarkuese të Hekurudhave të Maqedonisë - Transport me lokomotiva, ndërsa do të blihet edhe një sistem për planifikimin e burimeve.

Në seancën e sotme u miratua edhe strategjia fiskale e rishikuar për periudhën 2026-2030/ qa/

Foto: Printskrin