Shkup, 22 dhjetor 2025 (MIA) - Ministri i Mbrojtjes, Vllado Misajlovski në takimin e sotëm vjetor me atashetë e akredituar të mbrojtjes njoftoi se viti 2026 do të jetë vit i modernizimit të përshpejtuar dhe forcimit të ndjeshëm të kapaciteteve mbrojtëse. Ai vlerësoi se Armata ka përparuar me ritëm të përshpejtuar në ndërveprim, trajnim dhe pajisje gjatë vitit të kaluar dhe se vendi po hyn në një periudhë me qëllime të përcaktuara qartë, financim të qëndrueshëm dhe investime të rritura në projekte kyçe.

Misajllovski potencoi se Armata në vitin 2025 ka vazhduar me tempo të përshpejtuar të modernizimit, ndërveprimit dhe rritje të gatishmërisë, ndërsa vitin e ardhshëm ai proces do të përforcohet. 

"Kemi një qëllim të qartë për vitin 2026 - që sistemi mbrojtës të jetë modern, funksional, elastik dhe plotësisht i përafruar me përpjekjet e parandalimit të mbrojtjes në kontekstin e mbrojtjes kolektive, menaxhimit të krizave dhe sigurisë bashkëpunuese", theksoi ministri.

Ai nënvizoi se financimi i qëndrueshëm, modernizimi dhe kujdesi për personelin mbeten tri shtyllat e politikës së mbrojtjes. 

“Tre prioritetet mbi të cilat mbështetet mbrojtja dhe për të cilat fola në fund të vitit të kaluar - buxhetimi i qëndrueshëm, stimulimi shtesë në procesin e modernizimit dhe respektimi dhe promovimi i plotë i të drejtave dhe detyrimeve ndaj të punësuarve, janë prioritetet që mund të shiheshin në çdo hap që ndërmorëm në vitin 2025. Dhe këto janë shtyllat mbi të cilat do të vazhdojmë të ndërtojmë mbrojtjen dhe Armatën në vitin 2026”, theksoi ai.

Ky fokus, siç shtoi, është mbështetur edhe me rritje të buxhetit për vitin e ardhshëm. Siç tha, mbrojtja në vitin 2026 do të ketë në dispozicion 358 milionë euro, që është 8,4 për qind më shumë se këtë vit, ndërsa vetëm në modernizim do të investohen 116 milionë euro. 

“Vitin e ardhshëm, buxheti ynë është 358 milionë euro, që është 8,4 për qind më shumë se buxheti i këtij viti. Me rritje prej mbi 27,7 milionë euro në buxhetin e mbrojtjes për vitin e ardhshëm, ne garantojmë zhvillim edhe më të fortë dhe Armatë edhe më moderne me kapacitete më të forta - për sigurinë kombëtare dhe kolektive. Më konkretisht, në fushën e ndërtimit të kapaciteteve, planet për arritjen e paketës së objektivave të kapaciteteve dhe financimin e tyre të përcaktuara në Samitin e fundit të Aleancës në Hagë janë në një fazë të avancuar. Lidhur me modernizimin e Armatës, për të cilën po ndajmë 116 milionë euro në vitin 2026, që është pothuajse 10 milionë euro më shumë se mjetet e modernizimit në vitin 2025, ne po vazhdojmë gjithashtu me të gjitha projektet e blerjeve”, shtoi ministri.

Shtoi se modernizimi do të jetë i përqendruar në ngritjen e standardeve, lëvizshmërinë, mbështetjen e zjarrtë, sistemet e komunikimit dhe mbrojtjen personale të çdo pjesëtari. 

"Anëtarët tanë e meritojnë këtë. Ata kanë treguar dhe dëshmuar se janë profesionistë të vërtetë, të përkushtuar ndaj shërbimit dhe ndaj qëllimit tonë themelor - një shtet i sigurt, një rajon i qëndrueshëm dhe një mbrojtje e fortë kolektive", theksoi ministri.

Në prononcimin e tij, Misajllovski përkujtoi se viti 2025 ishte vit me numër rekord të stërvitjeve ushtarake, që dukshëm e ka rritur gatishmërinë operative. 

“Në vitin 2026, ne vazhdojmë të kontribuojmë në misionet dhe operacionet paqeruajtëse, si dhe brenda forcave shumëkombëshe të NATO-s. Me gjithsej 185 persona për të cilët janë planifikuar mbi 9 milionë euro, ne vazhdojmë të forcojmë paqen dhe sigurinë rajonale dhe të forcojmë mbrojtjen kolektive të Aleancës. Ne mbetemi në KFOR në Kosovë, EUFOR-ALTEA në Bosnjë dhe Hercegovinë, UNIFIL në Liban, si dhe në forcat shumëkombëshe të NATO-s në Letoni, Rumani dhe Bullgari”, tha ministri.

Shefi i Shtatmadhorisë, gjeneral major Sashko Lafçiski, e vlerësoi kontributin e atasheve në mbrojtje si kyç për zhvillimin e partneritetit. 

“Përmes dialogut të rregullt, aktiviteteve të koordinuara dhe nismave për trajnim, arritëm rezultate konkrete të cilat i fuqizuan kapacitetet në mbrojtje dhe ndërveprimin”, deklaroi Lafçiski. 

Ai nënvizoi se ky partneritet jo vetëm që i fuqizon lidhjet profesionale, por krijon “respekt dhe besim të ndërsjellë” i cili është i nevojshëm për ambient të qëndrueshëm të sigurisë. 

Duke iu përgjigjur pyetjeve të gazetarëve, ministri i Mbrojtjes deklaroi se Maqedonia nuk planifikon të dërgojë trupa në Ukrainë, duke theksuar se një vendim i tillë "as nuk është shqyrtuar dhe as nuk po merret parasysh" dhe se Armata mbetet e fokusuar në modernizim dhe përmbushjen e detyrimeve në kuadër të aleancave.

“Ne nuk po planifikojmë asgjë të tillë fare. Armata e Maqedonisë nuk do të dërgohet në territorin ukrainas. E kam thënë këtë shumë herë dhe e theksoj përsëri. Ne po përqendrohemi në modernizimin dhe detyrimet tona. Sigurisht, si pjesë e një aleance të madhe, ne do të ndihmojmë në çdo mënyrë që mundemi, por një vendim i tillë as nuk ishte në tryezë dhe as nuk po merret në konsideratë.

Për investimet kapitale, ministri theksoi se buxheti realizohet sipas dinamikës së furnizimeve, dhe se një pjesë e kursimeve janë të ridedikuar drejt blerjes së pjesëve rezervë për automjetet amerikane në Armatë.

Për helikopterët “Leonardo” tha se pret dy të arrihen vitin e ardhshëm, përderisa industria vendore vazhdon me zhvillim dhe planifikon projekte të reja në bashkëpunim me partnerët ndërkombëtarë. 

“Në fushën e industrisë së specializuar, ka kompani që duan të bashkëpunojnë me partnerë ndërkombëtarë, të bashkohen dhe të punojnë në projekte të ndryshme. Ne si Ministri jemi këtu për të ndihmuar në gjithçka që mundemi. Ka njoftime që besoj se vetë kompanitë do t'i shpallin vitin e ardhshëm. I ftoj të gjitha kompanitë të vijnë në Ministri - jemi të hapur për bashkëpunim”, tha ai. fc/

Foto: MIA