Munih, 13 shkurt 2026 (MIA) - Ministri gjerman i Mbrojtjes, Boris Pistorius, në ditën e parë të Konferencës së sigurisë në Munih, tha se vëren shenja të uljes së tensioneve në marrëdhëniet mes vendeve anëtare të NATO-s, njoftoi DPA.

Pistorius theksoi se në Evropë dhe SHBA po rritet njohja e ndërsjellë e objektivave që duhet të arrihen së bashku në kuadër të Aleancës.

"Tensionet janë ulur. Të dyja palët (SHBA dhe Evropa) përsëri e shohin situatën më qartë", tha Pistorius.

Ai shtoi se strategjia e sigurisë së SHBA-së, e cila ka zhvendosur përpjekjet e saj mbrojtëse nga Evropa drejt brendësisë së vendit dhe hemisferës perëndimore, si dhe fokusimi në kundërmasa ndaj kërcënimeve nga Kina, nuk e shqetëson, edhe pse strategjia ka shkaktuar shqetësim në disa kryeqytete evropiane.

Ministri theksoi se rritja e fondeve për mbrojtje në vitet e fundit në disa vende, veçanërisht në Gjermani, tregon se Evropa tashmë po lëviz në këtë drejtim. Sipas fjalëve të tij, SHBA-të gjithashtu e kanë theksuar "rolin e tyre jetik" në Aleancë, gjë që ndikon edhe në parandalimin bërthamor.

"Kur merren parasysh të gjithë këta faktorë, është e qartë se të dyja palët kanë interes për të punuar së bashku në kuadër të NATO-s, edhe nëse kjo do të thotë se duhet të riorganizohet", theksoi ministri. qa/

Foto: EPA