Shkup, 24 dhjetor 2025 (MIA) - Maqedonia sot është një vend në zhvillim, një shtëpi në të cilën ka vend për të gjithë njerëzit, ata që janë këtu, por edhe ata që kanë ikur jashtë vendit. Na duhet çdo vendas i Maqedonisë që dëshiron të kontribuojë për atdheun. Na duhet çdokush që ka mësuar diçka jashtë vendit dhe është i gatshëm ta investojë atë në atdhe. Na duhet çdokush që beson se ky vend mund dhe duhet të jetë një vend më i mirë për të jetuar. Përmes shembullit tuaj, sot u dërgojmë një mesazh kthimi të gjithë njerëzve tanë të lindur në Maqedoni që janë në të gjithë botën, tha kryeministri Hristijan Mickoski në forumin e të kthyerve në vend që u mbajt në Qeveri.

Sot po flas para njerëzve që mbajnë një peshë të veçantë në këtë shoqëri. Njerëz që e njohin atdheun si nga brenda, ashtu edhe nga jashtë. Njerëz që u larguan, jo sepse dëshironin ta braktisnin atdheun, por sepse jeta, koha dhe rrethanat i detyruan të kërkonin kushte më të mira, siguri dhe perspektivë. Dhe ajo që është më e rëndësishmja – njerëz që janë kthyer dhe kanë nisur këtu një histori të re dhe të suksesshme.

"Kthimi juaj nuk është simbolik. Ai është thelbësor. Është një mesazh se Maqedonia nuk është harruar, se rrënjët nuk janë këputur dhe se dashuria për shtëpinë nuk zhduket, pa marrë parasysh vitet dhe largësinë. Dua të them qartë dhe sinqerisht: Ne nuk mund të zemërohemi me ata që janë larguar. I kuptojmë. E kuptojmë mundimin e tyre, luftën e tyre dhe vendimet e tyre të vështira. Ne e dimë se shumë u larguan sepse nuk kishin zgjedhje. Sepse dëshironin një arsim më të mirë për fëmijët e tyre, një punë më të sigurt, një pagë dinjitoze, një jetë stabile. Dhe kjo është një nevojë njerëzore normale. Kjo është luftë për të ardhmen. Por, gjithashtu dimë edhe diçka tjetër. Se sa do larg që të shkojë njeriu, zemra gjithmonë e tërheq prapa. Sepse, siç thotë me urtësi populli ynë – guri peshon në vend të vet", tha Mickoski.

Kudo që të shkoni nëpër botë, sa do të suksesshëm që të jeni, atje gjithmonë do të jeni  ardhacakë.

"Vetëm në shtëpi je i joti. Vetëm në shtëpi emri yt, mundi yt dhe historia jote kanë rrënjë të thella dhe vlerë të qëndrueshme. Ju që jeni sot këtu, jeni dëshmia e gjallë për këtë. Ju treguat se njohuritë dhe përvoja e fituar jashtë nuk humbasin kur ktheheni, por marrin kuptim. Ato bëhen themel për biznese të reja, vende të reja pune, ide të reja dhe energji të re në ekonominë tonë. Vendi sot nuk është një vend që qëndron në vendnumëro. Maqedonia po ndryshon dhe po zhvillohet. Ekonomia po rritet. Po investohet në industri, në energjetikë, në infrastrukturë. Po ndërtohen rrugë, fabrika, kapacitete që sjellin vlerë të shtuar. Po hapet hapësirë për sipërmarrje, për inovacion, për të rinjtë dhe për ata që duan të investojnë dhe të krijojnë në shtëpi", theksoi kryeministri i Maqedonisë.

Si Qeveri, obligimi ynë është të krijojmë kushte. Të sigurojmë stabilitet, siguri juridike, mbështetje për investime dhe një drejtim të qartë për zhvillim.

"Por asnjë strategji, asnjë plan nuk mund të ketë sukses pa njerëzit. Shteti nuk ndërtohet vetëm me institucione. Shteti ndërtohet me mendje. Me njohuri. Me përvojë.

Me guxim për të marrë përgjegjësi. Prandaj themi me zë të lartë se na duhen të gjithë. Na duhet çdo maqedonas që dëshiron të kontribuojë. Na duhet secili që ka mësuar diçka jashtë dhe është i gatshëm ta investojë atë në shtëpi. Na duhet secili që beson se ky vend mund dhe duhet të jetë një vend më i mirë për të jetuar. Përmes shembullit tuaj, sot dërgojmë një mesazh për të gjithë njerëzit tanë të lindur në Maqedoni, kudo në botë. Ju kuptojmë. Ju respektojmë. Dhe dyert janë të hapura", tha ai.

Nuk premtojmë rrugë të lehtë. Por ofrojmë kuptim. Ofrojmë mundësinë për të qenë pjesë e diçkaje më të madhe.

Ofrojmë shansin që mundi të mos jetë vetëm sukses personal, por edhe kontribut për komunitetin dhe brezat e ardhshëm.

"Ofrojmë mundësinë për të qenë pjesë e diçkaje më të madhe. Ofrojmë shansin që mundi të mos jetë vetëm sukses personal, por edhe kontribut për komunitetin dhe brezat e ardhshëm. Shtëpia nuk është e përsosur. Shtëpia ndërtohet. Rregullohet. Përmirësohet. Dhe Maqedonia jonë e përbashkët sot është pikërisht kjo – një shtëpi që po ndërtohet dhe në të cilën ka vend për të gjithë njerëzit e saj. Ju jeni prova se kjo është e mundur. Ju jeni shembulli se kthimi është fuqi. Dhe ju jeni zëri që më së miri mund t'u tregojë të tjerëve – se guri, kur kthehet në vendin e vet, peshon më së shumti", thekson kryeministri Mickoski.

Forumi vazhdon me fjalime nga maqedonasit që janë kthyer në vend, si dhe përfaqësues nga disa institucione. sa/

Foto: MIA