Shkup, 20 dhjetor 2025 (MIA) – Mbi 25 për qind e konsumit përfundimtar bruto të energjisë në BE vitin e kaluar ishte nga burimet e rinovueshme, që është një rritje prej 0,7 pikësh përqindjeje krahasuar me vitin 2023. Kjo pjesë është 17,3 pikë përqindjeje më pak se përmbushja e objektivit të vitit 2030 (42,5 për qind), që do të kërkonte një rritje mesatare vjetore prej 2,9 pikësh përqindjeje nga viti 2025 deri në vitin 2030. Në Maqedoni, energjia nga burimet e rinovueshme përbënte 21,8 për qind të energjisë totale të konsumuar vitin e kaluar, që është një rritje prej 1,6 për qind krahasuar me vitin e kaluar, 2023.

Nga vendet e rajonit, sipas të dhënave të Eurostat, më së shumti energji nga burime të rinovueshme vitin e kaluar përdorën Shqipëria (43,1 për qind) dhe Mali i Zi (40,8 për qind). Pastaj vijojnë Kroacia (26,7 për qind), Serbia (25,8 për qind), Greqia (25,3 për qind) dhe Bullgaria (23,2 për qind).
 

Në nivel evropian, pjesa më e lartë e burimeve të energjisë së rinovueshme në konsumin total të energjisë ishte në Islandë (79,3 për qind) dhe Norvegji (77,9 për qind), ndërsa pjesët më të ulëta të burimeve të rinovueshme u regjistruan në Belgjikë (14,3 për qind), Luksemburg (14,7 për qind) dhe Irlandë (16,1 për qind).

Midis vendeve të BE-së, Suedia regjistroi pjesën më të lartë të konsumit përfundimtar bruto të energjisë që vjen nga burimet e rinovueshme (62,8 për qind). Suedia mbështetet kryesisht në biomasën e ngurtë, energjinë hidroelektrike dhe atë të erës. Finlanda pasoi me 52,1 për qind, duke u mbështetur në biomasën e ngurtë, erën dhe energjinë hidroelektrike, ndërsa Danimarka u rendit e treta me 46,8 për qind, me shumicën e energjisë së saj të rinovueshme që vjen nga biomasa e ngurtë, era dhe biogazi.
 
Midis vendeve të BE-së, më shumë se 75 për qind e energjisë elektrike të konsumuar në vitin 2024 u gjenerua nga burime të rinovueshme në Austri (90,1 për qind), Suedi (88,1 për qind) dhe Danimarkë (79,7 për qind). Konsumi i energjisë elektrike nga burimet e rinovueshme ishte gjithashtu i lartë edhe në Portugali (65,8 për qind), Spanjë (59,7 për qind), Kroaci (58,0 për qind), Letoni (55,5 për qind), Finlandë (54,3 për qind), Gjermani (54,1 për qind), Greqi (51,2 për qind) dhe Holandë (50,5 për qind), të gjithë kontribuan me më shumë se gjysmën e energjisë elektrike të konsumuar. Në anën tjetër të shkallës, pjesa e energjisë elektrike nga burimet e rinovueshme ishte më pak se 25 për qind në Maltë (10,7 për qind), Republikën Çeke (17,9 për qind), Luksemburg (20,5 për qind), Hungari dhe Qipro (të dyja  me 24,1 për qind) dhe Sllovaki (24,9 për qind).

Në Maqedoni, vitin e kaluar 40 për qind e energjisë totale të konsumuar është prodhuar nga burime të rinovueshme. Kjo është një rritje prej gati 8 për qind krahasuar me vitin 2023, kur energjia elektrike nga burimet e rinovueshme përbënte 32 për qind të energjisë totale të konsumuar. Vendi ka një rritje të vazhdueshme 20 vitet e fundit në pjesën e energjisë së rinovueshme në energjinë totale të konsumuar, nga 14,5 për qind në vitin 2004, në 19,2 për qind në vitin 2014, në 40,07 për qind në vitin 2024.

Vendet e EFTA-s, Norvegjia dhe Islanda, si dhe vendi kandidat Shqipëria, prodhuan më shumë energji elektrike nga burimet e rinovueshme sesa sasia totale e energjisë elektrike që konsumuan në vitin 2024, duke çuar në një pjesë mbi 100 për qind. Në disa nga këto raste, efekti vjen nga prodhimi më i lartë sesa konsumi me eksporte neto (Norvegjia) ose një pjesë reale prej 100 për qind, por normalizimi i energjisë hidroelektrike e çon rezultatin në një nivel më të lartë (Islanda dhe Shqipëria).

Rritja e energjisë elektrike të gjeneruar nga burimet e energjisë së rinovueshme midis viteve 2014 dhe 2024 pasqyron kryesisht zgjerimin e dy burimeve të energjisë së rinovueshme në të gjithë BE-në, përkatësisht energjisë së erës dhe energjisë diellore. Në vitin 2024, burimet e energjisë së rinovueshme përbënin 47,5 për qind të konsumit bruto të energjisë elektrike në BE, një rritje prej më shumë se 2 pikë përqindjeje nga viti i kaluar (45,4 për qind në vitin 2023).

Energjia e erës dhe hidroenergjia merrnin pjesë me pothuajse dy të tretat e energjisë totale të gjeneruar nga burimet e rinovueshme (përkatësisht 38,0 dhe 26,4 për qind). Një e treta e mbetur e energjisë elektrike të gjeneruar ishte nga energjia diellore (23,4 për qind), biokarburantet e ngurta (5,8 për qind ) dhe burime të tjera të rinovueshme (6,1 për qind). Energjia diellore është burimi me rritjen më të shpejtë: në vitin 2008, ajo përbënte 1 për qind. Kjo do të thotë që rritja e energjisë elektrike nga energjia diellore është dramatike, duke u rritur nga vetëm 7.4 TWh në vitin 2008 në 304 TWh në vitin 2024. ls/

Foto: MIA/ Eurostat