Gjenevë, 17 shkurt 2026 (MIA) - Irani beson se pjesëmarrja e mundshme indirekte e presidentit amerikan Donald Tramp në bisedimet bërthamore është një çështje me rëndësi të brendshme për Uashingtonin, jo për Teheranin, raportoi agjencia iraniane e lajmeve IRNA, duke cituar burime pranë ekipit negociator iranian.

 Korrespondenti i agjencisë nga Gjeneva sot raportoi se, sipas këtyre burimeve, Republika Islamike po hyn në negociata me qëllimin e qartë të heqjes së sanksioneve dhe arritjes së një marrëveshjeje që do t'i sjellë përfitime të prekshme për popullin iranian.

 Burime pranë delegacionit iranian deklaruan për IRNA-n se Teherani po merr pjesë seriozisht në negociata, duke kërkuar heqjen e sanksioneve të padrejta në këmbim të transparencës së nevojshme në lidhje me aktivitetet e tij bërthamore.

 Lidhur me raportet për pjesëmarrjen indirekte të presidentit amerikan, burime iraniane deklaruan se një çështje e tillë nuk ishte ngritur me palën iraniane, duke shtuar se një veprim i tillë ka të ngjarë të pasqyrojë dëshirën e Uashingtonit për të treguar se bisedimet po hyjnë në një fazë vendimtare.

 Ky raund bisedimesh indirekte midis Teheranit dhe Uashingtonit filloi sot në mesditë, pas bisedimeve të mëparshme që filluan më 6 shkurt në Muskat të Omanit. Si pjesë e procesit, Irani dhe ShBA po shkëmbejnë pikëpamje, mendime dhe propozime përmes shefit të diplomacisë së Omanit, Badër al-Busaidi.

 Edhe Irani edhe ShBA deri më tani i kanë përshkruar bisedimet si pozitive dhe kanë shprehur gatishmërinë e tyre për t'i vazhduar.

Irani deklaroi se po merr pjesë në bisedime me përgjegjësi dhe me vendosmëri për të zgjidhur krizën e panevojshme bërthamore, duke shtuar se një zgjidhje e drejtë mbetet e mundur nëse ShBA tregon vullnet të mjaftueshëm politik. 

 Foto: Arkivi i MIA-s