Shkup, 25 dhjetor 2025 (MIA) - Pa periudha ekstreme afatgjata, por me valë episodike të ftohta do të jetë ky dimër, tregojnë parashikimet më të fundit sezonale klimatike për vendin. Temperatura mesatare e dimrit do të jetë mbi mesataren shumëvjeçare për rreth +1 gradë Celsius. Valë të ftohta me temperatura rreth ose nën vlerat normale pritet nga fundi i dhjetorit deri në mesin e janarit, si dhe nga fundi i muajit shkurt, por pa sinjale për të ftohtë dimëror afatgjatë apo ekstrem.

Kthesa klimatike e përgatitur nga profesori Vlado Spiridonov, profesor i rregullt në Institutin e Fizikës pranë Fakultetit të Shkencave Natyrore dhe Matematikës në Shkup, dhe profesori Ivica Milevski nga Instituti i Gjeografisë pranë SHNM-së, tregon se na pret një dimër kryesisht i ndryshueshëm, i cili do të jetë mesatarisht i ngrohtë në krahasim me mesataren klimatike (1991–2020).

"Në zonat e ulëta, si Shkupi dhe Shtipi, priten temperatura mesatare dimërore prej 1-4 gradë (vlerat normale: Shkup 1,1-2,4 gradë, Shtip 1,6-3,1 gradë), ndërsa në zonat malore, si Mavrova, temperatura mesatare do të jetë prej 0 deri në -3 gradë (vlera normale -2 deri -4 gradë). Numri i ditëve me ngrica do të jetë 30-55 në vendet e ulëta dhe 60-75 në vendet malore, ndërsa ditët me akull do të jenë relativisht të rralla në vendet e ulëta (5-15), por më të shpeshta në ato malore (25-40). Valë të ftohta me temperatura rreth ose nën vlerat normale janë më të mundshme nga fundi i dhjetorit deri në mesin e janarit, si dhe nga fundi i shkurtit, por pa sinjale për të ftohtë dimëror afatgjatë apo ekstrem", thuhet në analizën e përgatitur mbi bazën e parashikimeve sezonale të ECMWF dhe UKMO. 

Reshjet do të shpërndahen në mënyrë të pabarabartë sipas rajonit dhe kohës, ndërsa bora do të përqendrohet në zonat malore, veçanërisht në Maqedoninë perëndimore dhe veriore (Mali Sharr, Bistra/Mavrovë, Baba, Jakupica). Në luginat e ulëta, shtresa e borës do të jetë e kohëpaskohshme dhe e paqëndrueshme, me kalime të shpeshta mes shiut dhe borës.

Nga aspekti hidrologjik, nuk priten skenar dramatik, por ekziston një rrezik i moderuar për përmbytje lokale, veçanërisht gjatë reshjeve intensive të kombinuara me shkrirjen e borës, më së shumti në fund të shkurtit dhe në mars.

Ndryshimet, siç thuhet në analizë, me siguri do të reflektohen në sektorin energjetik për shkak të kërkesës së ndryshimeve dhe rrezikut nga ngricat dhe bora e lagësht, në transport për shkak të bllokimeve nga bora, ngrica, rrëshqitjet e dheut në qafat malore dhe orteqet, në shëndetësi për shkak të ndotjes së ajrit dhe në bujqësi për shkak të rrezikut të ngricave dhe rrëshqitjeve të dheut. qa/

Foto:Arkivi i MIA-s, printskrin