Shkup, 20 dhjetor 2025 (MIA) - Nëse javën e ardhshme do të mbaheshin zgjedhje parlamentare, 26 për qind e qytetarëve do të votojnë për VMRO-DPMNE-në, ndërsa 8,9 për qind për LSDM-në opozitare. Nga politikanët qytetarët kanë besimin më të madh te kryeministri dhe kryetari i VMRO-DPMNE-së Hristijan Mickoski dhe shumica e tyre mbështesin zbatimin e sistemit "Qytet i sigurt". Këtë e tregojnë rezultatet e anketës së publikuar sot nga Instituti për Hulumtime Politike (IPIS) "Perceptimi i qytetarëve për vlerësimin e partive dhe politikanëve", të realizuar përmes një ankete telefonike midis 15 dhe 18 dhjetorit të këtij viti me 1.114 të anketuar në nivel shtetëror.

Në pyetjen "Për cilën parti do të votonit nëse do të kishte zgjedhje parlamentare javën e ardhshme?" 26 për qind e të anketuarve do të votonin për VMRO-DPMNE-në, 9.8 për qind për LSDM-në opozitare, 8.9 për qind për koalicionin BDI, 8.2 për qind për koalicionin VLEN, 5.9 për qind për Të Majtën, 3.9 për qind për ZNAM-in dhe 1.7 për qind për ndonjë parti tjetër. 13.1 për qind nuk do të votonin për asnjë parti, ndërsa 11 për qind e të anketuarve nuk janë përgjigjur, ndërsa 11.7 për qind thonë se nuk e dinin ose nuk kishin përgjigje.

Sipas anketës, në pyetjen "Në cilin politikan besoni më shumë?", 27.3 për qind e të anketuarve janë përgjigjur për Hristijan Mickoskin, ndërsa 25.5 për qind për - asnjë dhe 9.5 për qind nuk e dinë ose nuk kanë përgjigje. Nëntë për qind kanë besim më të madh te lideri i BDI-së, Ali Ahmeti, 5.1 për qind te kryetari i LSDM-së, Venko Filipçe, 5 për qind te Dimitar Apasievi nga E Majta, 3.8 për qind te Maksim Dimitrievski. Vijojnë me 3.5 për qind Izet Mexhiti, 2.8 për qind Bilall Kasami, 2.3 për qind Afrim Gashi, 2.1 për qind presidentja Gordana Siljanovska Davkova, 1.3 për qind ish presidenti Stevo Pendarovski, 1.1 për qind ish kryeministri Nikolla Gruevski.

Mendim pozitiv për punën e Qeverisë kanë 26.1 për qind e të anketuarve, 26 për qind me përgjigje – deri diku pozitive, 23.4 për qind - negative dhe 17.9 për qind - deri diku negative.

Mbështetje e plotë për sistemin "Qytet i sigurt", pra instalimi i kamerave për matjen e shpejtësisë dhe shkeljeve të tjera të komunikacionit ka nga shumica e të anketuarve, 63.9 për qind, 12.6 për qind janë përgjigjur - deri diku po 7.5 për qind - aspak dhe 5.2 për qind - deri diku po.

IPIS njofton se hulumtimi është kryer duke përdorur një mostër të rastësishme të stratifikuar për të ruajtur përfaqësimin e popullsisë në Republikën e Maqedonisë së Veriut. Në të janë ruajtur specifikat demografike të popullsisë si struktura gjinore, grupmoshat, niveli i arsimit dhe etnia, me një ndarje të përshtatshme të të anketuarve sipas vendbanimit dhe njësisë zgjedhore, ku Shkupi është marrë si një tërësi e veçantë për shkak të specifikave të tij.

"Hulumtimi është realizuar për nevojat e IPIS me qëllim analizimin e vlerësimeve të partive. Sondazhi është financuar nga fondet e vetë IPIS", thuhet në informatën e IPIS.

Foto: Printskrin i sondazhit IPIS