Скопје, 8 октомври 2023 (МИА) - Викендов во Дојран се одржа четвртиот модул на Школата за политики за 2023 година при Претседателскиот центар за политичко образование на тема „Геополитички импликации на војната во Украина: улогата на ЕУ и НАТО во регионот на Западен Балкан“, во соработка со фондацијата „Конрад Аденауер“ во Северна Македонија.

Како што информираат од Кабинетот на претседателот, поздравни обраќања и завршни согледувања имале проф. д-р Александар Љ. Спасов, претседател на Програмскиот совет на Претседателскиот центар за политичко образование, советник на претседателот за надворешна политика, внатрешна политика и уставни прашања и вонреден професор на Правниот факултет „Јустинијан Први“ и Даниела Поповска, член на Програмскиот совет на Претседателскиот центар за политичко образование и координатор на проекти при Фондацијата „Конрад Аденауер“ во Северна Македонија.

Пред учесниците на четвриот модул на Школата за политики се обратил и шефот на Делегацијата на Европската унија во земјава, амбасадорот Дејвид Гир, кој говорел за предизвиците на политиките за проширување на ЕУ.

Професорите Марјан Ѓуровски од Институтот за безбедност, одбрана и мир при Филозофскиот факултет на УКИМ, Стефан Сурлиќ од Факултетот за политички науки од Белград и Јоргос Кристидис од Катедрата за балкански, славистички иориентални студии при Универзитет „Македонија“ во Солун, одржале предавања на тема „Билатерални договори во регионот – привремени решенија или трајно решавање на долготрајни отворени билатерални спорови“.

Учесниците на четвртиот модул имале можност да дискутираат и за регионалните спорови во рамки на процесот на европската интеграција на регионот, која била и тема на која се обратил Зоран Нечев од Институтот за демократија „Социетас Цивилис“ – Скопје.

За местото и значењето на ефективниот мултилатерализам во време на глобални предизвици, пред учесниците говорел амбасадорот Пајо Авировиќ, специјален пратеник на претседателот при Постојаниот совет на Меѓународната организација на Франкофонијата и директор на Директоратот за мултилатерални односи и безбедносна соработка во Министерството за надворешни работи.

Учесниците на модулот биле вклучени и во работилницата „Кинеското влијание во Западен Балкан: Лост или кочница во приближувањето кон ЕУ?“, која ја водела Ана Крстиновска од НВО „ЕСТИМА“.

Школата за политики се одржува трета година по ред, во соработка со партнерски фондации и организации коишто се дел од Програмскиот совет на Претседателскиот центар за политичко образование: Фондацијата „Фридрих Еберт“ за Северна Македонија, Меѓународниот републикански институт (ИРИ), фондацијата „МК2025“, Фондацијата „Конрад Аденауер”, Фондацијата за демократија на Вестминстер во Северна Македонија и Националниот демократски институт (НДИ).фф/бак/

Фото: Кабинет на претседателот