Брисел, 5 март 2025 (МИА) - Студентите по медицина во Фландрија, Белгија, следната академска година ќе започнат со обука за лекување воени повреди.

Воведувањето на новата обука уследи по повиците на министерствата за одбрана и здравство до здравствените работници да се подготват за можни конфликти.

Стручната комисија ќе ја интегрира воената медицинска обука во наставната програма, потенцијално преку изборни предмети или дополнителна магистерска програма. Обуката за еластичност може да се вклучи и во други медицински дисциплини, како што се психотерапија и здравствена нега.

„Се надеваме дека никогаш нема да дојде до ова, но не можеме да ги закопаме главите во песок“, рече Пит Хебек, декан на Медицинскиот факултет на Универзитетот во Гент.

Деканот на Медицинскиот факултет на Универзитетот во Антверпен, Филип Лардон, изјави дека работата во зона на конфликт, иако веќе имаат висококвалификувани лекари, бара дополнителна експертиза.

„Војната претставува уникатни медицински предизвици во лекувањето траума, итна помош и хирургија“, рече Лардон.

Студентите ќе учат за масовна тријажа на жртви, процедури за евакуација и третман на прострелни рани, области каде што украинското искуство може да биде вредно бидејќи раните, како што се оние од напади со беспилотни летала, значително се разликуваат од траумите од Втората светска војна.

Иницијативата ги разгледува и современите закани, вклучувајќи биолошка, хемиска и бактериолошка војна. паг/

Фото: МИА архива