Рекорден приход на Суецкиот канал во финансиската 2021/2022 година
Приходите на Египет од Суецкиот канал достигнаа рекордни седум милијарди долари во финансиската година што заврши во јуни, објави претседателот на управата со каналот, Осама Рабеа.
Каиро, 5 јули 2022 (МИА) - Приходите на Египет од Суецкиот канал достигнаа рекордни седум милијарди долари во финансиската година што заврши во јуни, објави претседателот на управата со каналот, Осама Рабеа.
„Ова е за 20,7 отсто повеќе отколку во претходната финансиска година“, рече Рабеа.
Приходите се зголемени поради поголемиот број пловни објекти и поголемиот обем на товар во транзит, се наведува во соопштението на управата на Суецкиот канал.
Обемот на каргото се зголеми за 10,9 отсто во споредба со финансиската година 2020/2021, на исто така рекордни 1,32 милиони тони.
Низ каналот поминале 22.032 брода, 16,7 отсто повеќе од претходната година.
Каналот е најбрзата поморска рута меѓу Европа и Азија и еден од главните извори на девизен приход за египетската влада.
Проширувањето на каналот во 2015 година резултираше со ограничен раст на приходите, а новата фаза на проширување беше најавена откако товарниот брод „Евер Гивен“ се заглави во тесниот воден пат минатиот март и го блокираше сообраќајот шест дена, што предизвика нарушување на глобалната трговија.
Mia.mk користи колачиња Ние користиме колачиња за да го подобриме вашето искуство со прелистување, да опслужуваме персонализирани реклами или содржини и да го анализираме нашиот сообраќај. Со кликнување на „Прифати“, се согласувате со нашата употреба на колачиња.
