Скопје, 16 април 2026 (МИА) - Во македонскиот Културно-информативен центар во Загреб вчера беше промовирана книгата „Проникнување на тишината“ („Pronicanje tišine“) од Љерка Тот Наумова, авторка која подеднакво создава на два јазика - македонски и хрватски.

Настанот свечено го отвори директорката на македонскиот КИЦ во Загреб, Мими Ѓоргоска-Илиевска, која истакна дека Љерка Тот Наумова со  својата поезија ги поврзува луѓето преку зборот, чувството и мислата. Таа посочи и на значајната улога што ја има КИЦ, како „живо средиште на културен дијалог, соработка и поврзување меѓу македонската и хрватската култура и уметност“.

-Со ваквите настани и проекти продолжуваме активно да ја унапредуваме меѓусебната соработка и да ги промовираме културните вредности на двете земји, истакна Ѓоргоска-Илиевска.

Како што информира денеска КИЦ во Загреб, на промоцијата се обрати и амбасадорот на Македонија во Хрватска, Драган Ѓурчевски, кој ја истакна улогата и мисијата на македонскиот КИЦ во Загреб како значајна институција за унапредување на културната соработка, продлабочување на односите меѓу двете земји и заемна промоција на културните вредности на Македонија и Хрватска.

-Вечерта помина во извонредна атмосфера, со навистина импозантно присуство – преполна сала и многубројна публика која со голем интерес ја следеше промоцијата. На настанот присуствуваа и претставници на локалната и државната власт, што претставува дополнително признание за значењето на ваквите културни иницијативи. Македонскиот Културно-информативен центар во Загреб продолжува со својата мисија на афирмација на културните вредности и унапредување на културната соработка меѓу двете пријателски земји, се наведува во соопштението. хс/вј/ 

Фото: Културно-информативен центар на Северна Македонија во Загреб