Техеран, 27 март 2026 (МИА) – Две пристаништа во Кувајт се оштетени во сомнителни ирански напади, пренесе ДПА повикувајќи се на официјални извештаи.

Вооружените сили на Кувајт денеска на Х објавија дека пристаништата Мубарак ал-Кабир и Шувајх биле погодени од крстосувачка ракета и четири дрона рано изутрината. Нема извештаи за повредени. Во соопштението се додава дека биле пресретнати четири „непријателски“ крстосувачки ракети и три дрона. Не е јасно дали пристаништата се оштетени од директни погодоци или за време на одбранбените мерки.

Саудиска Арабија исто така извести за напади, вклучително и врз главниот град Ријад, кои биле одбиени. Вкупно 16 дронови и две ракети биле пресретнати. Вооружените сили на земјата соопштија дека дополнителни четири ракети паднале во морето и во ненаселени подрачја.

Обединетите Арапски Емирати и Бахреин исто така соопштија за напади во кои биле соборени дронови и ракети, се вели во посебни соопштенија. јт/

Фото: Вооружени сили на Кувајт на Х