Скопје, 30 јули 2025 (МИА) - Едно лице било лишено од слобода, откако полициски службеници го затекнале како пали оган во близина на автопатот Скопје - Тетово.

Како што информираат од Министерството за внатрешни работи, утрово околу осум часот било пријавено дека по наплатната станица „Глумово“, едно лице подметнува пожар.

- Полициски службеници излегле на местото и го затекнале 59-годишниот Р.З. од село Арнакија, општина Сарај, како потпалува ѓубриште и сува трева во близина на штала со добиток. Од екипа на Бригадата за противпожарна заштита - Скопје, пожарот бил изгаснат,  а лицето било лишено од слобода и приведено во полициска станица, појаснуваат од МВР.

Во соопштението се додава дека по целосно документирање на случајот, против него ќе биде поднесена соодветна пријава. бд/са/

Фото: „Фејсбук“ - страница на Министерството за внатрешни работи