Скопје, 10 ноември 2023 (МИА) - Министерката за одбрана Славјанка Петровска во рамките на официјалниот престој во Романија, во касарната Отопени ги посетила војниците од македонскиот контингент кои се дел од Мултинационалните сили на НАТО сместени во оваа сојузничка земја.

-Ги слушнав оценките на вашите претпоставени дека вашиот ангажман и посветеноста се на навистина највисоко ниво. Заедно со останатите нации, секој ден работите и учествувате во сите вежби и сите активности и давате позитивен пример и вие и колегите од претходната ротација, истакнала министерката на средбата со војниците.

Како што соопшти Министерството за одбрана, Петровска додала дека припадниците на Армијата кои ќе пристигнат со следната ротација ќе имаат сериозен предизвик да остават исто така добар впечаток.

-Секој еден од вас дава свој личен придонес за колективната безбедност и за успехот на Северна Македонија како членка на НАТО, нагласила министерката Петровска заблагодарувајќи им се војниците од македонскиот контингент во Мултинационалните сили на НАТО во Романија.

Таа посочила дека високите оценки за секој од 35 - мината македонски војници во овие НАТО сили, ја оправдуваат довербата што ја добиле од Министерството и Генералштабот и им порачала да продолжат да бидат посветени како и досега, да даваат сè од себе, да создадат пријателства и познанства кои ќе траат вечно и да се вратат назад во својата земја, кај своите семејства побогати за едно големо искуство.

Петровска во базата Отопени го посетила павилјонот каде се сместени македонските војници, по што бил организиран и ручек со сите припадници на Армијата.

Пред командантот на Мултинационалните сили, бригадниот генерал Константин Николаеску, и членовите на штабот, министерката Петровска се заблагодарила за топлиот пречек и за несебичниот придонес на сите НАТО војници во оваа мисија, кој, како што рекла таа, е потврда дека НАТО заштитува, обединува и зацврстува.

-Исклучително сум благодарна за силната поддршка која му ја давате на македонскиот контингент. Уверена сум дека секој припадник на Армијата дава свој придонес и дека нераскинливите врски кои ги создадовте ќе траат вечно, порачала министерката.

Северна Македонија својот придонес во рамки на Мултинационалните сили на НАТО во Романија го започна во ноември 2022 година, со испраќање на единица во јачина од еден вод, односно 35 припадници во рамките на овие НАТО сили. Целта на Мултинационалните сили на НАТО во источното крило на Алијансата е да ја зацврстат колективната безбедност и да го демонстрираат единството на земјите-членки во заштита на секоја педа сојузничка територија. дма/

Фото: Министерство за одбрана