КСС ќе бара изземање на судијата Зиков од споровите за работни односи
- Конфедерацијата на слободни синдикати денеска обвини дека судијата Санде Зиков постапува нестручно и непрофесионално по постапки поднесени од страна на синдикални претставници.
![КСС ќе бара изземање на судијата Зиков од споровите за работни односи](https://mia.mk/images/20221106120854_big_730x400_93.webp )
Скопје, 23 февруари 2021 (МИА) – Конфедерацијата на слободни синдикати денеска обвини дека судијата Санде Зиков постапува нестручно и непрофесионално по постапки поднесени од страна на синдикални претставници.
На денешната прес-конференција пред Апелацискиот суд во Скопје, синдикални претставници рекоа дека Зиков носи одлуки на штета на работниците и синдикалните претставници.
Посочија два случаи со синдикалниот претставник на Водовод, Зоран Дионисијев и со синдикалниот претставник на затворите, Стојанче Јовановски во кои одлучувал судијата Зиков.
-Зоран Дионисијев, синдикалниот претставник на Водовод Скопје, кој е претседател и на повисоко ниво добива отказ од работа спротивно на Законот за работни односи и конвенциите на МОТ и за истото поведува судска постапка. Првостепениот суд два пати донесува позитивна одлука, додека на Второстепениот суд, судијата Санде Зиков ја преиначува одлуката и одлучува дека синдикалните лидери слободно можат да се бркаат од работа, истакнаа синдикалните претставници.
Според нив, судијата Зиков ја злоупотребува својата положба и не го почитува трудовото право и меѓународните конвенции.
Најавија дека ќе поднесат претставка до Судскиот совет за изземање на судијата Зиков за водење на спорови од областа на работните односи, а за случајот ќе ги информираат и надлежните министерства, премиерот и претседателот на државата. бак/лв/