Крива Паланка, 18 ноември 2022 (МИА) - И во услови на криза, Крива Паланка ќе блесне во новогодишен сјај, благодарение на собраните донации од иселениците од оваа општина во Германија, Франција и САД. Градоначалникот на Општина Крива Паланка, Сашко Митовски, објави водени од минатогодишната позитивна атмосфера и реакции и на жителите и на посетителите, одлучиле без средства од општинскиот буџет, со поддршка од иселеници, да ја договорат реализацијата на новогодишно украсување. -Новогодишната радост доаѓа со празничната атмосфера, а радоста и среќата на граѓаните, на најмладите и дечињата, се мотив да овозможиме градот и годинава да блесне во новогодишен сјај. Во услови на енергетска криза и без трошоци од општинскиот буџет, со желба Крива Паланка да ги усреќи дечињата со празничен лик и атмосфера, тоа го овозможуваме благодарение на нашите иселеници кои се секогаш тука за нас. Нивните успешни компании носат радост за паланчани, за што од мое лично име и од името на граѓаните на Општина Крива Паланка, од име на најмалите дечиња јавно им се заблагодарувам на:„Мак-Бау", Германија, „ГДР Компани", Франција и вработените во оваа компанија, „Селект уан", САД и „Феникс Фенетрес", Франција. Благодарност до сите што овозможуваат градот повторно, како претходната година, да биде празничен, радосен и полн со посетители за време на новогодишните празници, изјави Митовски. Најави дека и годинава на централниот градски плоштад ќе се одржи  новогодишен базар со културно забавна програма за сите генерации. Митовски ги повика сите останати кои се во можност, да донираат и помогнат за најважното, детската среќа и насмевки. ид/цр/