Лондон, 3 декември 2024 (МИА) - Британскиот пејач и текстописец Елтон Џон присуствуваше на премиерата на својот мјузикл „Ѓаволот носи Прада“ (The Devil Wears Prada), во неделата во Лондон. Во таа пригода, тој рече дека, иако поради ослабнатиот вид не можел да ја гледа претставата, уживал во музиката.

- Не успеав многу да го погледнам сѐ тоа, затоа што, како што знаете, го изгубив видот, рече тој пред насобраните луѓе.

Во септември, пејачот откри дека преживеал тешка инфекција на очите што ја добил во јули. Во ноември, тој за американскиот телевизиски канал „Еј-би-си“ изјави дека боледува од делумно слепило на десното око, а „не е подобра“ ни состојбата на неговото лево око. Џон тогаш додаде дека здравствените проблеми го спречуваат да работи на нови музички проекти.

Елтон Џон (77) ја напиша музиката за „Ѓаволот носи Прада“. Мјузиклот е заснован на филмот од 2006 година. На гала-вечерта, на којашто се собираа средства за Фондацијата за истржувања за СИДА на Елтон Џон, присуствуваа познати личности, меѓу кои и од модната сцена - дизајнерката Донатела Версаче, но и главната уредничка на „Вог“ - Ана Винтур, за која се вели дека го инспирирала ликот на протагонистката Миранда Присли - модна величина со доста големо его.си/

Фото: ЕПА